वाघोली : शिरूर लोकसभा मतदार संघात मराठा समाजाचा एक अपक्ष उमेदवार दिला जाणार आहे. त्या संदर्भात नुकतीच मराठा बांधवांची वाघोलीत बैठक झाली. इच्छुक उमेदवारांच्या नावांचा अहवाल मनोज जरांगे पाटील यांच्याकडे पाठविण्यात येणार आहे. वाघेश्वर मंदिरात ही बैठक पार पडली.

लोकसभा निवडणुकीत मनोज जरांगे पाटील यांच्या माध्यमातून मराठा समाजाचा एक अपक्ष उमेदवार दिला जाणार आहे. त्याच संदर्भात वाघोलीतील सकल मराठा समाज बांधवांची बैठक पार पडली. मराठा आरक्षणासाठी लढणारे जरांगे पाटील यांनी अंतरवली सराटी येथे निवडणुकीमध्ये अपक्ष उमेदवारांचे नाव जाहीर करण्यासाठी मराठा समाजाला गावागावात बैठका घेऊन अहवाल पाठविण्याचे आवाहन केले होते.

शिरूर लोकसभेतील तालुके तसेच इतर गावात बैठका घेऊन मराठा समाज बांधव इच्छुक उमेदवारांचे अहवाल जरांगे पाटील यांच्याकडे पाठविणार आहेत. जरांगे पाटील शिरूर लोकसभेसाठी जो उमेदवार जाहीर करतील त्या उमेदवाराचे काम करण्याचा निर्णयही यावेळी बैठकीत घेण्यात आला.