फुरसुंगी : पिण्याच्या पाण्याच्या टँकरमध्ये महिलेचा मृतदेह सापडल्याची घटना पुण्यातील हडपसरजवळील फुरसुंगी इथं घडली. गुरुवारी सकाळी हा प्रकार उघड झाल्यानं नागरिकांमध्ये भीतीचं वातावरण निर्माण झालं होतं. (Woman body was found in a water tanker in Pune Fursungi)

हडपसर पोलीस ठाण्याचे वरिष्ठ निरीक्षक संतोष पांढरे यांनी दिलेल्या माहितीनुसार, कौशल्या मुकेश  मोर्या (वय २५, रा. दुगड चाळ, जेएसपीएम कॉलेज जवळ, हांडेवाडी) असं मृत महिलेचं नाव आहे. कोंढवा पोलीस ठाण्यात ही महिला हरवल्याची तक्रार दाखल करण्यात आलेली होती. येथील पावर हाउस या भागात नेहमीप्रमाणं सकाळी नऊ वाजण्याच्या सुमारास पाण्याचा टँकर आला होता. पाण्यासाठी नागरिकांनी गर्दी केली होती.

सुरुवातीला टँकरमधून पाणी सुरू झाले, मात्र काही वेळाने एकदमच पाणी येणे बंद झाले. पाणी बंद का झाले हे पाहण्यासाठी उतरलेल्या टँकर चालकाला साडीचा तुकडा अडकल्याचे निदर्शनास आले. साडीचा तुकडा ओढून देखील बाहेर निघत नसल्याने टँकरवर चढून त्यानं टँकरमध्ये डोकाऊन पाहिलं असता महिलेचा मृतदेह असल्याचे त्याला दिसले. त्याने याबाबत त्वरित हडपसर पोलिसांना संपर्क साधून याची माहिती कळवली.

हडपसर पोलिसांच्या पथकाने घटनास्थळी त्वरित धाव घेत हा मृतदेह बाहेर काढून पंचनामा करीत पुढील तपासासाठी हा मृतदेह ससून रुग्णालयात शव विच्छादनासाठी पाठवला आहे.