लोणी काळभोर (पुणे) : हडपसर येथील एका खासगी रुग्णालयात उपचार सुरू असताना गुरुवारी (ता. 30) मध्यरात्रीच्या सुमारास मृत्यू झालेली कदमवाकवस्ती (ता. हवेली) येथील 70 वर्षीय महिला कोरोनाबाधित असल्याचे आढळून आले आहे. पूर्व हवेलीत मागील पंधरा दिवसांत आढळून आलेला हा कोरोनाचा पाचवा रुग्ण आहे. 

जोरदार पावसाने पुणे शहराला झोडपले

कदमवाकवस्तीच्या माळवाडी येथील एका महिलेला मागील काही दिवसांपासून मुत्राशयाचा त्रास सुरू होता. तिला बुधवारी (ता. 29) दुपारी हडपसर येथील एका खासगी रुग्णालयात उपचारासाठी दाखल केले होते. मात्र, उपचार सुरू असताना गुरुवारी मध्यरात्री तिचा मृत्यू झाला. त्यानंतर रुग्णालय प्रशासनाने संबंधित महिलेची कोरोना टेस्ट केली. त्यात ती पॉझिटिव्ह असल्याचा प्रकार पुढे आला. 

पुण्याच्या इतर बातम्या वाचण्यासाठी येथे क्लिक करा

याबाबतची माहिती मिळाल्यानंतर कदमवाकवस्ती ग्रामपंचायत प्रशासन व जिल्हा परिषदेच्या आरोग्य विभागाने कोरोनाबाधित महिलेच्या संपर्कात आलेल्या माळवाडी येथील तब्बल 27 जणांना तातडीने माळवाडी परिसरातील नागरिकांपासून वेगळे केले आहे. तसेच, त्यांची कोरोनाची तपासणी करण्यासाठी पुणे येथील नवले रुग्णालयात हलविले आहे. आशा सेविकांनी तीनच दिवसांपूर्वी माळवाडी परिसरातील घरोघरी जाऊन माहिती घेतली होती. त्यावेळी महिलेच्या नातेवाइकांनी कसलीही माहिती दिली नव्हती, असे लोणी काळभोर प्राथमिक आरोग्य केंद्राचे आरोग्य अधिकारी डॉ. डी. के. जाधव यांनी सांगितले. 

पूर्व हवेलीत मागील पंधरा दिवसांच्या कालावधीत उरुळी कांचन येथील एका महिलेसह चार जण कोरोनाबाधित असल्याचे आढळून आले आहे. या चार जणांमध्ये सत्तेचाळीस वर्षीय महिला, संबंधित महिलेवर उपचार करणारे कदमवाकवस्ती येथील खासगी रुग्णालयातील एक डॉक्‍टर व दोन नर्सचा समावेश आहे. तसेच, डॉक्‍टर व महिलेच्या संपर्कात आलेल्या सव्वाशेहुन अधिक जण क्वारंटाइन केले आहे. त्यातच माळवाडी येथील येथील महिलेचा कोरोनामुळे मृत्यू झाला. त्यामुळे पूर्व हवेलीत भीतीचे वातावरण पसरले आहे.