पुणे - प्रवास भत्ता (Transport Allowance) बील (Bill) मंजुर करण्यासाठी साडे तीन हजार रुपयांची लाच (Bribe) घेणाऱ्या मुळशीतील एकात्मिक बाल विकास योजना प्रकल्प कार्यालयातील कनिष्ठ लिपीक महिलेस (Women) लाचलुचपत प्रतिबंधक विभागाने (एसीबी) अटक (Arrested) केली.

सीमा विद्याधर विपट (वय 47) असे अटक केलेल्या कनिष्ठ लिपीक महिलेचे नाव आहे. याप्रकरणी 26 वर्षीय व्यक्तीने तक्रार दिली होती. त्यानुसार संबंधीत महिलेविरुद्ध पौड पोलिस ठाण्यात भ्रष्टाचार प्रतिबंधक कायद्यानुसार गुन्हा दाखल करण्यात आला आहे. "एसीबी'ने दिलेल्या माहितीनुसार, तक्रारदार हे एकात्मिक बाल विकास योजना प्रकल्प कार्यालयात कर्मचारी म्हणून कार्यरत आहेत.

पुणे जिल्हा परिषेदेच्या अंतर्गत या विभागाचे कामकाज चालते. या ठिकाणी सीमा विटप या कनिष्ठ लिपीक म्हणून काम करतात. तक्रारदार यांनी प्रवास भत्ता बील मंजुरीसाठी त्यांच्याकडे अर्ज केला होता. हे बील मंजूर केल्याचा मोबदला म्हणून विपट यांनी तक्रारदाराकडे टक्केवारीनुसार तीन हजार 450 रूपयांची लाच मागितली होती. त्यानुसार तक्रारदार यांनी लाच लुचपत प्रतिबंधक विभागाकडे तक्रार केली होती. तक्रारीची पडताळणी केल्यानंतर लाच मागितल्याचे निष्पन्न झाले. त्यानुसार मंगळवारी संबंधीत कार्यालयाच्या परिसरातच विपट यांना लाच घेताना अटक करण्यात आली. अतिरीक्त पोलिस अधिक्षक राजेश बनसोडे यांच्या मार्गदर्शनाखाली ही कारवाई करण्यात आली.