आपुलकी प्रतिष्ठानतर्फे
५ गरजू महिलांना
उपजीविकेची साधने
सांगोला, ता. २३ : आर्थिकदृष्ट्या दुर्बल व कुटुंब प्रमुख गमावलेल्या महिलांना स्वावलंबी बनविण्याच्या उद्देशाने आपुलकी प्रतिष्ठानच्या वतीने शहर व तालुक्यातील पाच गरजू महिलांना उपजीविकेची साधने वाटप करण्यात आली.
प्रतिष्ठानच्या कार्यालयात झालेल्या कार्यक्रमात मेडशिंगी येथील निर्मला मोरे, शालन अवघडे व सांगोला येथील माया इंगोले यांना शेळ्या, पुष्पा पारसे यांना शिलाई मशिन, तर वाटंबरे येथील उज्ज्वला पवार यांना पिठाची गिरणी देण्यात आली. प्रमुख पाहुणे पत्रकार भारत कदम यांनी प्रतिष्ठानच्या कार्याचे कौतुक करत हा उपक्रम समाजासाठी प्रेरणादायी असल्याचे सांगितले. अध्यक्ष राजेंद्र यादव यांनी प्रास्ताविक केले. यावेळी पत्रकार निसार तांबोळी, उद्योजक राजेंद्र बिरगे, प्रतिष्ठानचे सदस्य, हितचिंतक व नागरिक मोठ्या संख्येने उपस्थित होते. महिलांच्या आर्थिक सक्षमीकरणासाठी राबविण्यात आलेल्या या उपक्रमाचे उपस्थितांनी स्वागत केले.