Worker's Strick : वालचंदनगर (ता.इंदापूर) येथे वालचंदनगर कंपनीतील ५०० पेक्षा अधिक कामगारांनी सुमारे ७.५ कोटी रुपयांच्या थकीत वेतनासाठी वालचंदनगर मध्ये एक दिवसाचे लाक्षणिक उपोषणास सुरवात केली.

वालचंदनगर मधील वालचंदनगर कंपनीतील कामगारांनी आज मंगळवार (ता.१५) रोजी जुन्या वालचंदनगर बसस्थानकार वर एक दिवसाचे लाक्षणिक उपोषण केले. उपोषणामध्ये कंपनीतील ५०० पेक्षा अधिक कामगारांनी सहभाग घेतला. यासंदर्भात आयएमडी कामगार समन्वय संघाचे अध्यक्ष कपिल गायकवाड व सचिव शहाजी दबडे यांनी सांगितले की, वालचंदनगर कंपनीने फेब्रुवारी,मार्च,एप्रिल या तीन महिन्याचा कामगारांचा पगार दिला नाही.

तसेच एप्रिल २०२१ ते जुन २०२३ या काळामध्ये कामगारांनी केलेल्या जादा कामाचे (ओव्हरटाईमचे) ही वेतन दिले नाही. जानेवारी २०२० ते जून २०२३ या काळातील मेडिकल स्क्रीम अंतर्गतचे पेमेंट दिले नाहीत. २०२३ मधील तीन महिन्याचे इन्सेंटिव्ह पेमेंट ही थकित असून तीन वर्षाचा एलटीए पेमेंट तसेच दोन वर्षापासून कामगारांना गणवेश मिळाला नाही. कामगारांचे पगार व इतर देणी थकीत असल्याने कामगारांच्या कुंटूबासमोर आर्थिक अडचणी उभा राहिल्या आहेत.कामगारांची उपासमार होत आहे.

कामगारांच्या थकीत पैशासंदर्भात वेळोवळी कंपनीच्या व्यवस्थापनाशी चर्चा केली. मात्र व्यवस्थापन दाद देत नसल्यामुळे एक दिवसाचे लाक्षणिक उपोषण करण्याचा निर्णय घेतला असल्याचे सांगितले.उपोषणामध्ये भारतीय मजदूर संघाच्या मशनरी मॅन्युफॅक्चरींग वर्क्स युनियनच्या सदस्यांनी सहभाग घेतला असून सर्व कामगार एकजुटीने आंदोलनामध्ये सहभागी झाले असल्याचे मशनरी मॅन्युफॅक्चरींग वर्क्स युनियनचे अध्यक्ष राहुल बावडेकर यांनी सांगितले.