माळेगाव, ता. १० : बारामती तालुक्यात १२ वी उत्तीर्ण विद्यार्थ्यांसाठी आणि पालकांसाठी शारदानगरमध्ये नवे शैक्षणिक धोरण २०२० स्कूल कनेक्ट अभियानानिमित्त कार्यशाळेचे आयोजन केले आहे. गुरुवारी (ता. १३) शारदाबाई पवार महिला कॉलेज शारदानगर येथे सकाळी १० वाजता ही कार्यशाळा घेण्यात येईल. नव्याने आलेली शैक्षणिक पद्धत आणि त्यामध्ये झालेले बदल, बहुविद्याशाखीय अभ्यासक्रम, मल्टिपल एन्ट्री मल्टिपल एक्झिट, एकसमान श्रेयांक-क्रेडिट पद्धत, 3+1 वर्षांचा पदवी अभ्यासक्रम, पाच वर्षांचा एकात्मिक बहुविद्याशाखीय पदव्युत्तर अभ्यासक्रम (मास्टर्स), वर्गातील प्रवेश कसे घ्यावेत, कोणती विद्याशाखा निवडावी, राष्ट्रीय शैक्षणिक धोरण विद्यार्थ्यांना कसे फायदेशीर ठरणार आहे आदी विषयांच्या अनुषंगाने कार्यशाळेला विशेष महत्त्व प्राप्त झाले आहे. कार्यशाळेत सहभागी होणारे पालक आणि विद्यार्थ्यांना नोंदणी शुल्क नाही. सावित्रीबाई फुले पुणे विद्यापीठाचे प्राचार्य आणि व्यवस्थापन परिषदेचे सदस्य डॉ. देविदास वायदंडे आदी शिक्षण तज्ञ उपस्थितांना मार्गदर्शन करणार असल्याची माहिती डॉ. श्रीकुमार महामुनी यांनी दिली.