पिंपरी, ता. १४ ः ‘‘महापालिकेच्या यशवंतराव चव्हाण स्मृती (वायसीएम) रुग्णालयातील रुग्णसेवेचा दर्जा उंचावण्यासाठी आणि रुग्णांना भेडसावणाऱ्या समस्या तातडीने मार्गी लावणार आहे’’, अशी माहिती स्थायी समिती सभापती अभिषेक बारणे यांनी दिली. रुग्णालयातील विविध विभागांची पाहणी केली. रुग्णांना मिळणाऱ्या आरोग्य सुविधांचा आढावा घेतला. वॉर्डांतील अत्यावश्यक सोयी, वैद्यकीय उपकरणांची स्थिती आणि लिफ्टच्या वारंवार उद्‍भवणाऱ्या समस्या जाणून घेतल्या. लिफ्ट दुरुस्तीची सूचना केली. रुग्णालयातील स्वच्छता, खाटांची व्यवस्था आणि सुरळीत पाणीपुरवठा याबाबत सूचना केल्या. विद्युत विभाग आणि अग्निशमन यंत्रणेची सुरक्षाविषयक मानके तपासून काटेकोर अंमलबजावणी करण्यास सांगितले. सामान्य रुग्णांना वेळेवर औषधे मिळतील आणि कोणत्याही उपकरणाच्या अभावी उपचार थांबणार नाहीत, यासाठी योग्य नियोजन व व्यवस्थापन करण्याच्या सूचनाही त्यांनी केल्या.