नसरापूर : भोर तालुक्यात गेल्या तीन दिवसापासून पावसाने जोरदार हजेरी लावली असून पुर आलेल्या शिवगंगा नदीमध्ये पोहण्यासाठी गेलेला एक विवाहित तरुण बेपत्ता झाला आहे. पोलिसांनी शोधकार्य सुरू केले आहे. मात्र सुरू असलेल्या पावसामुळे पाण्याचा वाढता प्रवाहामुळे शोधकार्य मोहीम मध्ये अडचणी निर्माण होत आहे.

सलीम सुलतान शेख वय २९, रा. कांजळे ( ता. भोर ) असे तरुणाचे नाव असून गुरवारी (ता २२) दुपारी साडे तीन वाजण्याच्या सुमारास कांजळे गावच्या स्मशानभूमी जवळ शिवगंगा नदीच्या पुरात सलीम शेख हा त्याचा मित्र नवनाथ जाधव याच्या समवेत पोहण्यासाठी गेले होता. यावेळी सलीम हा अंगावरील कपडे काढून एकटाच पोहण्यासाठी नदीत उतरला. मात्र पाण्याचा प्रवाह वाढत गेल्याने सलीम हा पाण्याच्या प्रवाहात बेपत्ता झाला.

सलीम शेख हा वाहून गेल्याचे लक्षात आल्यावर राजगड पोलीस, गावातील तरुण आणि मच्छिमार तसेच भोर येथील भोई समाजातील तरुणांनी शिवगंगा नदी पात्रात सलीमचा शोध सुरू केला असल्याची माहिती येथील ग्रामपंचायत सदस्य नाना जाधव यांनी दिली. सुरू असलेल्या पावसामुळे नदी - नाल्यामधील पाण्याचा प्रवाह वाढल्यामुळे शोधकार्यात अडथळे येत आहेत.

पोलिस निरीक्षक संदिप घोरपडे, यांच्या मार्गदर्शनाखाली सहायक पोलिस निरीक्षक मनोज नवासरे, उपनिरीक्षक निखिल मगदूम, हवालदार सतीश चव्हाण, उमेश जगताप, खंडेराव ताठेले यांच्या पथकाने स्थानिक तरुणांसह शोध मोहीम सुरू ठेवली आहे.