पुणे - मॅट्रीमोनी संकेतस्थळावर (Matrimony Website) ओळख झाल्यानंतर लग्नाचे (Marriage) आमिष दाखवून व वेगवेगळी कारणे सांगून शहरातील एका उच्चशिक्षित तरुणीला (Girl) एका तरुणाने २४ लाख रुपयांचा गंडा (Cheating) घातल्याचा प्रकार उघडकीस आला आहे. आरोपीने खोट्या नावाने नोंदणी करून तरुणीला फसविल्याचे समोर आले आहे. या प्रकरणी चतुःश्रुंगी पोलिस ठाण्यात फसवणुकीचा गुन्हा दाखल करण्यात आला आहे.

याबाबत एका ३१ वर्षीय तरुणीने तक्रार दिली आहे. त्यानुसार निशांत रमेशचंद्र नंदवाणा (रा. किशनगंज, राजस्थान) याच्यावर गुन्हा दाखल करण्यात आला आहे. ३० ऑगस्ट ते २२ सप्टेंबर २०२१ दरम्यान हा प्रकार घडला. पोलिसांनी दिलेल्या माहितीनुसार, तक्रारदार तरुणी उच्चशिक्षित असून तिने शादी डॉट कॉम या संकेतस्थळावर नोंदणी केली होती. आरोपीने या संकेतस्थळावर अधितांश शिवप्रकाश अग्निहोत्री नावाने नाव नोंदणी केली होती. या ठिकाणी तरुणीची आरोपीसोबत ओळख झाली. आरोपीने तो सेंट्रल मिनिस्ट्री ऑफ हौसिंग अँड अर्बन अफेअर या ठिकाणी नोकरीला असल्याचे सांगितले. त्यानंतर लग्नाचे आमिष दाखवून तरुणीकडून आरोपीने वेगवेगळी कारणे सांगून २४ लाख रुपये घेतले. त्यानंतर आरोपीने तरुणीशी संपर्क कमी केला.

आरोपी तरुणींचा विश्‍वास संपादन करून त्यांना लग्नाचे आमिष दाखवत. त्यानंतर त्यांचा अश्‍लील व्हिडिओ काढून त्याआधारे पैसे मागत त्यांची फसवणूक करीत असल्याचे एका गुन्ह्यात निष्पन्न झाले आहे. पिंपरी चिंचवड परिसरातील देखील एका तरुणीशी आरोपीने अशाच पद्धतीने फसवणूक केल्याचे समोर आले होते. या गुन्ह्याचा तपास करत वाकड पोलिसांनी राजस्थान येथे जाऊन नंदवाणा याला पकडले. तोच दुसऱ्या नावाने महिलांना मॅट्रीमोनी साईटवरून फसवणूक करत असल्याचे आढळून आले. त्याने पुणे परिसरातील उच्च शिक्षित तरुणीची फसवणूक केल्याचे समोर आल्यानंतर त्याला अटक केली आहे. या प्रकरणी सहायक पोलिस निरीक्षक राजेश माळेगावे हे अधिक तपास करत आहेत.