आंबेगाव : आपल्या न्याय आणि हक्कासाठी माहितीचा अधिकार ही मोठी ताकद आपल्याला शासनाने देऊ केली आहे. खरा कायदा तोच असतो ज्याचा सर्वसामान्य नागरिकाला फायदा होतो. विद्यार्थीदशेतच आपल्या देशाचे भवितव्य घडत असते. त्यामुळे विद्यार्थ्यांना माहिती अधिकाराचा पाया माहिती असणे गरजेचे आहे.असे प्रतिपादन ऍड. रवींद्र नरभवर यांनी केली. माहिती अधिकार दिनानिमित्त माहितीपर व्यख्यानात ते बोलत होते.

२८ सप्टेंबर हा माहिती अधिकार दिन सर्वत्र साजरा करण्यात यावा असे आवाहन प्रभारी निवासी उपजिल्हाधिकारी संजय तेली यांनी केले होते. या आवाहनाला प्रतिसाद देत युवा संवाद सामाजिक संस्थेच्या वतीने महात्मा फुले विद्यानिकेतन संस्था संचालित शारदा प्राथमिक आणि श्री शिवाजी माध्यमिक विद्यालय टेल्को कॉलनी दत्तनगर येथे विद्यार्थ्यांमध्ये जनजागृतीपर व्यख्यानाने साजरा करण्यात आला.

यावेळी युवा संवाद सामाजिक संस्थेचे अध्यक्ष धनराज गरड म्हणाले की,लोकांना माहिती अधिकाराचे महत्व पटवून सांगणे काळाची गरज आहे. २००५ पासून अंमलात आलेल्या या विशेष अधिकाराची नागरिकांना जाण करून देण्यासाठी माहिती अधिकार दिन मोठ्या प्रमाणात साजरा कराला हवा असे गरड म्हणाले.यावेळी पायल दूधभाते, तृप्ती मरगळे, पूनम चौधरी विद्यार्थ्यांनींनी मनोगत व्यक्त केले.

यावेळी,श्री शिवाजी माध्यमिक मुख्याध्यापक शिवाजी शिंदे, गौतम बामणे,युवा संवाद सामाजिक संस्थेचे विश्वास सूर्यवंशी,मोहनीश नायर,पत्रकार संतोष गाजरे,यांचेसह विद्यार्थी शिक्षक आणि शिक्षकेत्तर कर्मचारी वर्ग उपस्थित होता.