इंदापूर - इंदापूर बारामती राज्य मार्गावर निमगाव केतकी नजीक हेगडे वस्तीलगत दोन चारचाकी वाहनाच्या झालेल्या धडकेत अझहर मुख्तार पठाण (वय २३ वर्ष, रा. ४० फुटी रोड, दर्गाह मस्जिद चौक, शिवशंभो मंदिरासमोर, इंदापूर) या सिव्हील इंजिनियर युवकाचा दुर्दैवी मृत्यू झाला. शहरातील प्रसिद्ध कंत्राटदार मुख्तार पठाण यांचा तो मोठा मुलगा असून या अपघातात अन्य दोघे जण जखमी झाले आहेत. हा अपघात दि. ७ जून रोजी सकाळी साडे दहा वाजता घडला असून, यासंदर्भात सरफराज मुलाणी यांनी फिर्याद दिली आहे. त्यानुसार टाटा टियागो वाहन चालका विरुद्ध इंदापूर पोलीस ठाण्यात गुन्हा दाखल करण्यात आला.

अझहर पठाण हे आपले मामा समीर मुलाणी, मावशी सायरा मुसा खान, मावस बहीण सलोनी मुसा खान व मावस भाऊ आफताब मुसा खान यांच्याबरोबर ह्युंदाई कंपनीच्या सँट्रो ( क्र. एमएच ४२ एएक्स ५७९८) गाडीतून निमगाव केतकी बाजू कडून इंदापूरच्या दिशेने निघाले होते, तर टाटा टियागो (क्र. एमएच १३ डीटी ४१२२) भरधाव वेगाने इंदापूर कडून निमगाव केतकी कडे निघाली होती. हेगडे वस्तीजवळ कुत्र्यास वाचवताना चालकाचे नियंत्रण सुटलेल्या टियागोने विरुद्ध दिशेस जावून समीर मुलाणी चालवत असलेल्या सँट्रो गाडीस वाहन चालक सिटच्या पाठीमागील बाजूस जोरदार धडक दिली. त्यामुळे वाहन चालकाच्या पाठीमागे बसलेल्या अझहर पठाण याच्या डोक्याला गंभीर इजा होवून टियागो ७० फुटांपेक्षा जास्त अंतरावर उजव्या बाजूस झुडूपांमध्ये जाऊन अडकली.

अपघातानंतर अझहर पठाण याला इंदापूर उपजिल्हा रुग्णालयात दाखल करण्यात आले. परंतु, डॉक्टरांनी अझहर यास औषधोपचार करण्यापूर्वी मृत असल्याचे घोषित केले. अन्य जखमींवर इंदापूर शहरात खाजगी रुग्णालयात उपचार सुरू आहेत. पोलीस निरीक्षक तय्यब मुजावर यांच्या मार्गदर्शनाखाली पुढील तपास सुरू आहे.

सिव्हील इंजिनिअर अझहर यास नुकताच पुणे येथील कंपनीत जॉब लागला होता. तीन दिवसांत तो कामावर हजर होणार होता. मात्र काळाने त्याच्यावर अचानक घाला घातल्याने परिसरात हळहळ व्यक्त होत आहे.