महाविद्यालयीन विद्यार्थिनींचे
फलटणमध्ये काव्यसंमेलन

मसाप शाखेकडे नावनोंदणीचे आवाहन

आसू, ता. ५ : जागतिक महिला दिनाचे औचित्य साधून रविवारी (ता. ८) महाराष्ट्र साहित्य परिषदेच्या फलटण शाखेच्या वतीने तालुक्यातील कनिष्ठ व वरिष्ठ महाविद्यालयीन विद्यार्थिनींसाठी ‘काव्य संमेलना’चे आयोजन केले आहे.
तालुक्यातील तरुण कवयित्रींना हक्काचे व्यासपीठ मिळावे, त्यांच्यातील काव्यप्रतिभेला वाव मिळावा, या हेतूने हे काव्य संमेलन आयोजित करण्यात येत आहे. संमेलनात सहभागी होऊ इच्छिणाऱ्या विद्यार्थिनींनी शाखा कोषाध्यक्ष अलका बेडकीहाळ, शाखा कार्यवाह अमर शेंडे, रोहित वाकडे यांच्याशी संपर्क साधून नावनोंदणी करावी. तालुक्यातील जास्तीतजास्त विद्यार्थिनींनी या संधीचा लाभ घ्यावा, असे आवाहन केले आहे.
या उपक्रमात सहभागी विद्यार्थिनींतून ज्या कवयित्री उत्तम काव्य सादरीकरण करतील, त्यांना महाराष्ट्र साहित्य परिषदेच्या मुख्य व्यासपीठावर आणि पुढील साहित्यिक उपक्रमांत काव्यरचना सादर करण्याची संधी उपलब्ध करून दिली जाणार आहे. दर्जेदार काव्य करणाऱ्या तरुणींना योग्य दिशा व व्यासपीठ मिळवून देण्यासाठी परिषद कटिबद्ध असल्याचे शाखेचे अध्यक्ष रवींद्र बेडकीहाळ यांनी स्पष्ट केले. फलटण तालुक्यातील महाविद्यालयांनी विद्यार्थिनींना या साहित्यिक चळवळीत सहभागी होण्यासाठी प्रोत्साहित करावे, असे आवाहनही बेडकीहाळ यांनी केले आहे.

........................................