पुणे :‘‘सरकारने रोटीला तिजोरीत बंद केले आहे. त्याच्या विरोधात देशातील सर्व शेतकऱ्यांची लढाई सुरू आहे. सरकारच्या विरोधात सुरू असलेल्या आंदोलनाचा शेवट काय होईल, हे सांगता येणार नाही. शेतकऱ्यांचे आंदोलन हे खाजगीकरण्याच्या विरोधात आहे.  त्यासाठी देशातील युवकांनी सरकारच्या विरोधात क्रांती करावी,’’ असे आवाहन भारतीय किसान युनियनचे राष्ट्रीय प्रवक्ता राकेश टिकैत यांनी केले.

भारतीय छात्र संसद फाऊंडेशन, एमआयटी स्कूल ऑफ गव्हर्नमेंट आणि एमआयटी वर्ल्ड पीस युनिव्हर्सिटी यांच्या वतीने आयोजित ऑनलाइन ‘भारतीय छात्र संसद’च्या आठव्या सत्रात ‘कृषी विधेयकाला विरोध का?’ विषयावर टिकैत बोलत होते. यावेळी ‘एमआयटी’चे संस्थापक अध्यक्ष डॉ. विश्वनाथ कराड, आसाम विधानसभेचे उपसभापती डॉ. नमुल मोमीन, भारतीय कृषक समाजाचे अध्यक्ष डॉ. कृष्णा बीर चौधरी आदी मान्यवर उपस्थित होते.

टिकैत म्हणाले,‘‘सरकारने देशातील सर्व संस्थांना ताब्यात घेतले असून हे असंविधानिक आहे. त्या संदर्भात युवकांना जागृत होणे गरजेचे आहे. सरकारने देशातील सर्व सरकारी संपत्ती विक्रीस काढल्या आहेत. ब्राझीलमध्ये शेतकऱ्यांची जमीन ही कंपन्याच्या हातात आहे. तशीच स्थिती या देशात यायला वेळ लागणार नाही. हे वाचविण्यासाठी जमीन वाचवावी लागेल.’’

देशात शेतकऱ्यांच्या कल्याणासाठी सरकारने तीन कायदे आणले असून ते अत्यंत महत्त्वाचे असल्याचे वक्तव्य डॉ. कृष्णा बीर चौधरी यांनी केले. तर डॉ. मोमीन म्हणाले,‘‘देशाच्या विकासासाठी व आर्थिक वृद्धिसाठी शेतकऱ्यांची भूमिका महत्वाची आहे. देशात शेतकऱ्यांच्या नावाने आंदोलन सुरू करून राजकारण करू नका.’’ यावेळी डॉ. पौर्णिमा बागची यांनी सूत्रसंचालन केले.