मांजरी (पुणे) : केवळ पूजा-पाठावर सुरू असलेला चरितार्थ कोरोनामुळे बंद झाला. कुटुंबातील इतर कोणीही कमावते नाही. बंद पडलेल्या बॅंकेत अडकलेली पुंजी. शारीरिक व्याधी असल्याने दुसरे काही करू शकत नाही. त्यामुळे फुरसुंगी भेकराईनगर येथील एका ब्राह्मण कुटुंबावर वेळ आली आहे. निराशेच्या गर्तेत जाऊन जीवन संपविण्याच्या विचारात असलेल्या या कुटुंबाला युवा सेनेच्या कार्यकर्त्यांनी मदतीचा हात देऊन सावरले आहे. 

पुण्यातील 'या' भागात गल्लोगल्ली भयाण शांतता, कारण... 
 

गेली तीस वर्षापासून दीपक तांबोळी हे पूजा-पाठ व शुभकार्य करीत आहेत. सायकलवरून उदबत्ती विकण्याचेही काम ते करीत होते. यातून पत्नी व मुलीसह ते आपला चरितार्थ चालवीत आहेत. मात्र, कोरोना व लॉकडाऊनमुळे त्यांचा हा रोजगार बंद झाला आहे. जी काही पुंजी होती तीही संपलेली आहे. मधुमेह, रक्तदाब, मान व मणक्‍याचे आजार त्यामुळे दुसरे काम होत नाही. या परिस्थितीत या कुटुंबावर उपासमारीची वेळ आली आहे. 

पुणेकरांनो, सावधान ! 'या' भागात वावरतोय बिबट्या 

तांबोळी यांनी एक पत्र लिहून त्यात आपली परिस्थिती मांडली आहे. त्यात त्यांनी धान्याच्या स्वरूपातील मदतीची अपेक्षा व्यक्त केली आहे. पोलिसांनीही त्यांना काही वेळा जेवण पुरविले आहे. मदत मिळणार नसल्यास जीवन संपविण्याशिवाय पर्याय नसल्याचेही त्यांनी या पत्रात म्हटले आहे. 

पुण्याच्या इतर बातम्या वाचण्यासाठी येथे- क्लिक करा

हे पत्र त्यांच्या ओळखीच्या एका व्यक्तीने व्हाट्‌सऍपवर व्हायरल केले होते. क्रीडा पुरस्कार विजेते रूपेश मोरे यांनी हे पत्र युवासेनेचे शादाब मुलाणी यांना दाखवले. दरम्यान मुलाणी यांच्यासह कार्यकर्ते नीलेश पवार, लता ढमाळ, मयूर शिंदे, पंकज भारती यांनी तांबोळी यांच्या घरी जाऊन तीन महिने पुरेल इतका किराणा, धान्य, औषधे व गॅस भरून दिला आहे. खर्चासाठी दिले जात असलेले पैसे मात्र त्यांनी नाकारले. युवासेनेने केलेल्या मदतीमुळे या कुटुंबाने समाधान व्यक्त केले आहे.