पुणे - सावित्रीबाई फुले पुणे विद्यापीठ आणि नवी दिल्ली येथील असोसिएशन ऑफ इंडियन युनिव्हर्सिटीज यांच्या संयुक्त विद्यमाने विद्यापीठामध्ये येत्या १९ ते २३ डिसेंबर दरम्यान ‘युवास्पंदन - आंतरविद्यापीठीय पश्‍चिम विभाग युवक महोत्सव २०१८’ आयोजित केला आहे. 

विद्यापीठाला यंदा पहिल्यांदाच या महोत्सवाच्या आयोजनाचा मान मिळाला आहे. कुलगुरू डॉ. नितीन करमळकर यांच्या हस्ते बुधवारी या महोत्सवाच्या बोधचिन्हाचे अनावरण झाले. या वेळी प्र-कुलगुरू डॉ. एन. एस. उमराणी, कुलसचिव डॉ. प्रफुल्ल पवार, व्यवस्थापन परिषद सदस्य राजेश पांडे, प्रसेनजित फडणवीस, प्राचार्य डॉ. संजय चाकणे, विद्यापीठ विद्यार्थी विकास मंडळाचे संचालक आणि महोत्सवाचे संयोजक सचिव डॉ. प्रभाकर देसाई उपस्थित होते.

‘‘महाराष्ट्र, गोवा, गुजरात व राजस्थान या चार राज्यांमधील विद्यापीठांमधून दोन हजार विद्यार्थी कलावंत या महोत्सवामध्ये संगीत, नृत्य, नाट्य, ललित कला व साहित्य या प्रकारांमधील कला सादर करणार आहेत,’’ असे डॉ. करमळकर यांनी सांगितले. विद्यापीठातील विद्यार्थ्यांची सांस्कृतिक अभिरुची समृद्ध होण्यामध्ये हा उपक्रम महत्त्वाचा ठरणार असल्याचा विश्वास प्र- कुलगुरू डॉ. उमराणी यांनी या निमित्ताने व्यक्त केला.