चंदीगढ : आज पंजाबमध्ये ११७ जागांसाठी मतदान (Punjab Election 2022) पार पडत आहे. निवडणूक आयोगाने काही तक्रारीनंतर आज बॉलीवूड अभिनेता सोनू सूदची (Sonu Sood) गाडी जप्त केली. तसेच त्याला घरी पाठवण्यात आलं. त्यानंतर आता सोनू सूदने प्रतिक्रिया दिली आहे. (Election Commission Confiscated Sonu Sood Car)

विरोधकांकडून, विशेषत: अकाली दलाच्या लोकांकडून विविध बूथवर धमक्या आल्याची माहिती आम्हाला मिळाली. काही बूथवर पैसे वाटले जात आहेत. त्यामुळे निष्पक्ष निवडणुका व्हाव्या याचा तपास करणे हे आपले कर्तव्य आहे. म्हणूनच आम्ही घराबाहेर पडलो होतो. आता आम्ही घरी आहोत, असं सोनू सूदनं सांगितलं आहे.

सोनू सूदची गाडी का केली जप्त? -

सोनू सूदची बहिण माविका सूद या मोगामधून काँग्रेसच्या तिकीटावर निवडणूक लढवत आहेत. पण, सोनू सूद हे मतदारांवर प्रभाव टाकत असल्याची तक्रार शिरोमणी अकाली दलाचे उमेदवार बरजिंदर सिंग यांनी केली होती. त्यानंतर निवडणूक आयोगाने सोनू सूदची गाडी जप्त केली.

दरम्यान, सोनू सूद एका मतदान केंद्रात जाण्याचा प्रयत्न करत होता. यादरम्यान त्याची कार जप्त करून त्याला घरी पाठवण्यात आले. घरातून बाहेर पडल्यास त्याच्यावर कारवाई केली जाईल, असा इशारा मोगा जिल्ह्याचे पीआरओ प्रभदीप सिंह यांनी दिला आहे.