मुंबई : बजाज फायनान्सची उपकंपनी असलेल्या बजाज हाउसिंग फायनान्सच्या संचालक मंडळाने आज चार हजार कोटी रुपयांच्या ‘आयपीओ’ला मंजुरी दिली आहे.  कंपनीने ही माहिती शेअर बाजारांना कळवली आहे. संबंधित मंजुऱ्या, नियामकांची संमती आणि अन्य बाबींच्या अधीन राहून हा ‘आयपीओ’ बाजारात येईल.

बजाज हाउसिंग फायनान्स ही मोठी बिगरबँकिंग वित्तसंस्था असून, तिचे आठ कोटी छत्तीस लाख ग्राहक देशभरात आहेत. पुण्यात मुख्यालय असलेल्या ‘बजाज हाउसिंग फायनान्स’तर्फे नवी घरखरेदी, घराचे नूतनीकरण किंवा व्यापारी जागांची खरेदी यासाठी नागरिकांना किंवा कंपन्यांना कर्जे दिली जातात.

वैयक्तिक किंवा व्यावसायिक गरजांसाठी मालमत्ता तारण ठेवूनही कर्जे दिली जातात. व्यवसायवाढीसाठी किंवा खेळत्या भांडवलाच्या उभारणीसाठी कंपनीची मालमत्ता तारण ठेवूनही कर्जे दिली जातात.

निवासी आणि व्यापारी जागा विकसित करणाऱ्या बांधकाम व्यवसायिकांनाही कंपनी अर्थसाह्य देते. ‘क्रिसिल’ या पतमानांकन संस्थेतर्फे ‘बजाज हाउसिंग फायनान्स’ला दीर्घकालीन कर्जांसाठी ‘एएए-स्टेबल’ हा सर्वोच्च मानांकन दर्जा देण्यात आला आहे, तर लघुकालीन कर्जांसाठी‘ ए वन प्लस’ दर्जा दिला आहे.