नवी दिल्ली : सलग दोन तिमाहीत एकूण देशांतर्गत उत्पादन (जीडीपी) घटल्याने जपान आणि ब्रिटनची अर्थव्यवस्था मंदीच्या गर्तेत गेल्याचे स्पष्ट झाले आहे. जपानची अर्थव्यवस्था तिसऱ्या क्रमांकावरून चौथ्या क्रमांकावर गेली आहे.

आता जर्मनी आता जगातील तिसरी सर्वांत मोठी अर्थव्यवस्था बनली आहे. जपानची अर्थव्यवस्था सुमारे ४.३ लाख कोटी डॉलरची आहे. जपानचा ‘जीडीपी’ डिसेंबर २०२३ला संपलेल्या तिमाहीत ०.४ टक्क्यांवर आला, त्याआधीच्या ऑक्टोबर तिमाहीत ३.३ टक्क्यांनी घसरला होता. कमकुवत चलन, घटती लोकसंख्या अशा समस्यांमुळे जपानच्या अर्थव्यवस्थेच्या वाढीवर परिणाम होत आहे.

यापूर्वी २०१० मध्ये चीनच्या अर्थव्यवस्थेच्या वाढीमुळे जपान दुसऱ्या स्थानावरून तिसऱ्या स्थानावर गेला होता. अमेरिकेची अर्थव्यवस्था जगात पहिल्या क्रमांकावर आहे.

ब्रिटनचा ‘जीडीपी’ ०.३ टक्के

ब्रिटनच्या सांख्यिकी विभागाने आज जाहीर केलेल्या आकडेवारीनुसार, देशाचा ‘जीडीपी’ डिसेंबर २०२३ या तिमाहीदरम्यान ०.३ टक्के व सप्टेंबर तिमाहीत ०.१ टक्क्यांनी घसरला. डिसेंबर तिमाहीत बांधकाम, उत्पादनासह सर्व मुख्य क्षेत्रांमध्ये मंदी होती. ब्रिटनमध्ये महागाईदर जानेवारीमध्ये बँक ऑफ इंग्लंडच्या दोन टक्क्यांच्या लक्ष्याच्या दुप्पट चार टक्के होता. महागाईला आळा घालण्यासाठी मध्यवर्ती बँकेने गेल्या वर्षी ऑगस्टपासून ते ५.२५ टक्क्यांवर स्थिर ठेवले आहेत.