मुंबई : दिवाळीच्या खरेदीसाठी आता बाजारपेठांमध्ये लोकांची गर्दी वाढू लागली असून, या हंगामात ३.५ लाख कोटी रुपयांपेक्षा जास्त व्यवसाय होण्याचा अंदाज कॉन्फेडरेशन ऑफ ऑल इंडिया ट्रेडर्सने (कॅट) वर्तविला आहे. या दिवाळीच्या हंगामात दिल्लीत सुमारे १० टक्के म्हणजे ३५ हजार कोटी रुपयांचा व्यवसाय होण्याची शक्यता आहे.

दागिने, कपडे, खाद्यपदार्थ, इलेक्ट्रॉनिक वस्तू, वाहने अशा सर्वच क्षेत्रांत खरेदी वाढत असल्याचे दिसत आहे. केंद्र सरकार आणि राज्य सरकारांनीही कर्मचाऱ्यांना दिवाळीचा बोनस जाहीर केला आहे. त्यामुळे खरेदीला चालना मिळाली असून, लोक सढळ हाताने पैसे खर्च करत असल्याचे दिसत आहे. यामुळे व्यावसायिकांमध्येही आनंदाचे वातावरण आहे, असे कॅटचे ​​राष्ट्रीय अध्यक्ष बीसी भारतीया आणि राष्ट्रीय सरचिटणीस प्रवीण खंडेलवाल यांनी सांगितले.

या हंगामातील एकूण व्यावसायिक उलाढालीत २० टक्के वाटा वाहने, खेळणी यांचा, तर किराणा मालाचा वाटा १३ टक्के असण्याचा अंदाज आहे. दागिन्यांचा वाटा नऊ टक्के, तर इलेक्ट्रॉनिक्स आणि मोबाईलचा वाटा आठ टक्के असेल. कपडे १२ टक्के, सजावटीच्या वस्तूंचा वाटा तीन टक्के, सौंदर्यप्रसाधने सहा टक्के, मिठाई, सुकामेवा यांचा वाटा चार टक्के असण्याचा अंदाज कॅटने वर्तविला आहे.