Rahul Gandhi on Adani Coal Scam: लोकसभा निवडणुकीचे पाच टप्पे पार पडल्यानंतर राजकीय वातावरण आणखी तापले आहे. या दरम्यान, काँग्रेस नेते राहुल गांधी यांनी भाजप सरकारवर जोरदार टीका केली आहे. फायनान्शिअल टाइम्स वृत्तपत्राचे कटिंग शेअर करत त्यांनी लिहिले की, वर्षानुवर्षे सुरू असलेल्या या घोटाळ्यातून मोदीजींचे प्रिय मित्र अदानी यांनी कमी दर्जाचा कोळसा तिप्पट किमतीत विकून हजारो कोटी रुपयांची लूट केली आहे.

राहुल गांधींनी इंग्रजी वृत्तपत्र फायनान्शिअल टाइम्सचे कटिंग शेअर केले आहे. यामध्ये कोळशाशी संबंधित अहवाल देण्यात आला आहे. याबाबत राहुल गांधी यांनी भाजप सरकारला धारेवर धरले आहे.

राहुल गांधी यांनी ट्विटरवर लिहिले की, भाजप सरकारमध्ये मोठा कोळसा घोटाळा समोर आला आहे. ज्याची किंमत सर्वसामान्य जनतेने महागडी वीज बिले भरून स्वतःच्या खिशातून चुकवली आहे.

त्यासोबत त्यांनी पुढे लिहिले की, या उघड भ्रष्टाचारावर ईडी, सीबीआय आणि आयटीला गप्प ठेवण्यासाठी किती टेम्पोची गरज होती हे पंतप्रधान सांगतील का? 4 जून नंतर, इंडिया आघाडीचे सरकार या मेगा घोटाळ्याची चौकशी करेल आणि जनतेकडून लुटलेल्या प्रत्येक पैशाचा हिशेब देईल.

अहवालात आरोप करण्यात आला आहे की अदानी समूहाने कमी दर्जाचा कोळसा (प्रति किलो 3,500 कॅलरीज असलेला) इंडोनेशियाकडून खरेदी केला आणि तो 6,000-कॅलरी कोळसा म्हणून विकून मोठा नफा मिळवला.

जानेवारी 2014 च्या इनव्हॉइसेसचा हवाला देऊन, फायनान्शिअल टाइम्सने दावा केला आहे की 2014 मध्ये एकूण 1.5 दशलक्ष टन कोळशाच्या 22 शिपमेंट्सचा पुरवठा करण्यात आला. ज्याद्वारे अदानी समूहाने त्याचे पैसे दुप्पट केले.

अदानी समुहाने 32,000 कोटी रुपयांची फसवणूक केल्याचा दावा करत गांधी यांनी असेच आरोप केले होते आणि ते म्हणाले होते की, "गौतम अदानी इंडोनेशियामध्ये कोळसा खरेदी करतात आणि तो भारतात पोहोचतो तेव्हा त्याची किंमत दुप्पट होते."