वॉशिंग्टन : आंतरराष्ट्रीय नाणेनिधीने (आयएमएफ) आर्थिक वर्ष २०२५ साठी भारताच्या वाढीचा (जीडीपी) अंदाज ६.५ टक्क्यांवरून ६.८ टक्क्यांपर्यंत वाढविला आहे. देशांतर्गत मागणीची चांगली स्थिती आणि कामाच्या वयाची वाढती लोकसंख्या यामुळे जानेवारीत वर्तविलेल्या ६.५ टक्क्यांच्या अंदाजात ३० आधारभूत अंकांची वाढ करण्यात आली आहे.

या कालावधीत चीनच्या वाढीचा अंदाज ४.६ टक्के राहण्याचा अंदाज आहे, त्यामुळे भारत जगातील सर्वांत वेगाने वाढणारी अर्थव्यवस्था राहणार आहे. आंतरराष्ट्रीय नाणेनिधी आणि जागतिक बँकेच्या वार्षिक बैठकीपूर्वी जागतिक आर्थिक अंदाज अहवाल प्रसिद्ध केला, त्यात ही माहिती देण्यात आली आहे.

भारताच्या ‘जीडीपी’ वाढीचा दर आर्थिक वर्ष २०२४-२५ मध्ये ६.८ टक्के आणि २०२५-२६ मध्ये ६.५ टक्के राहण्याचा अंदाज आहे. यातून देशांतर्गत मजबूत मागणी आणि कामाच्या वयोगटातील लोकसंख्येचे सामर्थ्य प्रतिबिंबित होते, असेही या अहवालात म्हटले आहे.

त्याच वेळी, उदयोन्मुख आणि विकसनशील आशियातील देशांच्या वाढीचा दर २०२३ मधील अंदाजे ५.६ टक्क्यांवरून २०२४ मध्ये ५.२ टक्के आणि २०२५ मध्ये ४.९ टक्क्यांपर्यंत घसरण्याची अपेक्षा आहे. चीनमधील वाढ २०२३ मध्ये ५.२ टक्क्यांवरून २०२४ मध्ये ४.६ टक्के आणि २०२५ मध्ये ४.१ टक्क्यांपर्यंत घसरण्याचा अंदाज आहे, तर जागतिक वाढीचा वेग २०२४ आणि २०२५ मध्ये ३.२ टक्केच राहील, असा अंदाज आहे.

अनेक देशांच्या अर्थव्यवस्थेच्या वाढीचा वेग कमी राहण्याचा अंदाज आहे. महागाईशी लढण्यासाठी अनेक देशांच्या मध्यवर्ती बँकांनी व्याजदर वाढवल्यामुळे मंदीची धोका कायम आहे. अशा परिस्थितीतही जागतिक अर्थव्यवस्था लक्षणीयरीत्या लवचिक राहिली आहे. मात्र, आर्थिक विकासाला चालना देण्यासाठी प्रभावी उपाययोजनांवर भर देण्याची गरज आहे, असे नाणेनिधीचे मुख्य अर्थशास्त्रज्ञ पियरे-ऑलिव्हियर गौरींचास यांनी म्हटले आहे.

ठळक मुद्दे

• भारत जगातील सर्वांत वेगाने वाढणारी अर्थव्यवस्था

• चीनच्या वाढीचा अंदाज ४.६ टक्के

• जागतिक वाढीचा वेग २०२४ व २०२५ मध्ये ३.२ टक्के