RBI Repo Rate : एचडीएफसी लिमिटेड (हाऊसिंग डेव्हलपमेंट फायनान्स कॉर्पोरेशन) चे अध्यक्ष दीपक पारेख यांनी शनिवारी सांगितले की, "आम्ही भाग्यवान आहोत की शेवटी रिझर्व्ह बँकेने व्याजदराचे चक्र थांबवले आहे."

चलनविषयक धोरण समितीच्या गुरुवारी झालेल्या दोन दिवसीय बैठकीनंतर केंद्रीय रिझर्व्ह बँकेने दरांमध्ये कोणताही बदल न करण्याचा निर्णय घेतल्यानंतर, दीपक पारेख यांनी यावर भाष्य केले.

आरबीआयच्या निर्णयाने सर्वांनाच आश्चर्याचा धक्का बसला :

आरबीआयच्या निर्णयाने सर्वांनाच आश्चर्याचा धक्का दिला आहे. सलग 11 महिन्यांच्या वाढीमुळे रेपो दरात आतापर्यंत 250 बेसिस पॉइंट्सची वाढ झाली आहे.

यावेळी देखील अशी शक्यता होती की RBI MPC पुन्हा 25 बेसिस पॉइंटने दर वाढवू शकेल. पण तो 6.5% ठेवण्याचा निर्णय घेऊन समितीने सर्वांना चकित केले.

दर पुन्हा वाढू शकतात :

आरबीआयचे गव्हर्नर शक्तिकांत दास यांनी पत्रकार परिषदेत इशारा दिला की, व्याजदरात घेतलेल्या विरामाचा अर्थ असा नाही की येथून पुढे दर स्थिर राहतील किंवा कपात सुरू होईल. गरज भासल्यास आरबीआय पुन्हा दर वाढवण्यास मागेपुढे पाहणार नाही, असे ते म्हणाले.

दीपक पारेख यांनी भारताच्या आर्थिक स्थिरतेवर विश्वास व्यक्त केला

एसपी जैन इन्स्टिट्यूट ऑफ मॅनेजमेंट अँड रिसर्च येथे एका व्यवस्थापन कार्यक्रमात बोलताना, एचडीएफसीच्या अध्यक्षांनी जागतिक अर्थव्यवस्थेतील अस्थिरतेच्या संदर्भात, भारतात व्याजदर स्थिर ठेवल्याचा निर्णय घेतल्याचे कौतुक केले.

ते म्हणाले की, जागतिक धक्क्यांपासून भारतही वाचलेला नाही. परंतु काही मोठ्या अर्थव्यवस्थांपेक्षा भारत वेगळा आहे.

ते म्हणाले की भारतामध्ये सामर्थ्य, राजकीय स्थैर्य, लस सुरक्षा, अन्न सुरक्षा आणि मजबूत उपभोगावर आधारित अर्थव्यवस्था असे अनेक पैलू आहेत. याव्यतिरिक्त, डिजिटल उपक्रमांमध्ये लक्षणीय प्रगती पाहिली आहे.

आपल्या भाषणाच्या शेवटी, ते म्हणाले की, सध्या भारतात तरुण असणे खूप उत्साहजनक आहे कारण आपण सतत उद्योजकतेच्या संधी पाहत आहोत.