नवी दिल्ली : उन्हाळ्याच्या तीव्र झळा जाणवण्यास सुरुवात झाली असताना, महागाई सुसह्य झाल्याने सर्वसामान्य नागरिकांना मोठा दिलासा मिळाला आहे. फेब्रुवारीमध्ये ग्राहक किंमत निर्देशांकावर आधारित किरकोळ महागाईचा दर ५.०९ टक्के नोंदवला गेला अाहे. गेल्या चार महिन्यांतील हा कमी दर आहे.

जानेवारीच्या तुलनेत महागाईदर थोडा अधिक असला, तरीही गेल्या वर्षीच्या फेब्रुवारीच्या तुलनेत खूप कमी आहे. सलग सहा महिने महागाई रिझर्व्ह बँकेच्या दोन ते सहा टक्के या अपेक्षित मर्यादेच्या आत राहिला आहे. राष्ट्रीय सांख्यिकी कार्यालयाने आज ही आकडेवारी प्रसिद्ध केली.

अधिकृत आकडेवारीनुसार, जानेवारी महिन्यामध्ये किरकोळ महागाईचा दर ५.१ टक्के होता, तर फेब्रुवारी २०२३ मध्ये तो ६.४४ टक्के होता. अन्नधान्याच्या महागाईचा दर फेब्रुवारीमध्ये ८.६६ टक्के होता. जानेवारीमधील ८.३ टक्क्यांवरून त्यात किरकोळ वाढ झाली आहे.

ग्रामीण भागातील महागाईदर फेब्रुवारीमध्ये ५.३४ टक्के नोंदवला गेला. जानेवारीमध्ये हा दर तितकाच होता. डिसेंबरमध्ये महागाईदर ५.९३ टक्के होता. शहरी भागातील महागाईदर जानेवारीमधील ४.९२ टक्क्यांच्या तुलनेत फेब्रुवारीमध्ये ४.७८ टक्के नोंदवला गेला.

गेल्या महिन्यात, रिझर्व्ह बँकेने चालू आर्थिक वर्षात ग्राहक किंमत निर्देशांकावर आधारित महागाईदर ५.४ टक्के राहण्याचा अंदाज वर्तवला होता आणि जानेवारी-मार्च तिमाहीत ती पाच टक्के नोंदवली गेली होती.

महागाई दर

• ग्रामीण - ५.३४ टक्के

• शहरी- ४.७८ टक्के

• अन्नधान्य -८.६६ टक्के

औद्योगिक वाढ

देशाच्या औद्योगिक उत्पादनात जानेवारीमध्ये ३.८ टक्के वाढ झाली आहे. सरकारने आजही आकडेवारी जाहीर केली. जानेवारी २०२२३ मध्ये हे प्रमाण ५.८ टक्के होते. औद्योगिक उत्पादन निर्देशांक जानेवारीमध्ये ३.८ टक्क्यांनी वाढला. उत्पादन क्षेत्राने ३.२ टक्क्यांनी वाढ नोंदवली असून, मागील वर्षीच्या याच महिन्यातील ४.५ टक्क्यांपेक्षा या महिन्याच वाढ मंदावली आहे.

या वर्षी जानेवारीमध्ये, खाण उत्पादनात ५.९ टक्क्यांनी, वीज उत्पादनात ५.६ टक्क्यांनी वाढ झाली. एप्रिल २०२३ ते जानेवारी २०२४ या कालावधीत औद्योगिक उत्पादन निर्देशांकामध्ये ५.९ टक्के वाढ झाली आहे. मागील वर्षीच्या याच कालावधीत ती ५.५ टक्के होती.