नवी दिल्ली : देशाच्या औद्योगिक उत्पादनवाढीचा दर (आयआयपी) मार्चमध्ये ४.९ टक्क्यांवर घसरला आहे. फेब्रुवारीमध्ये हा दर ५.७ टक्के होता, असे सांख्यिकी मंत्रालयाने आज प्रसिद्ध केलेल्या आकडेवारीतून समोर आले आहे.

‘आयआयपी’ने यापूर्वी ऑक्टोबर २०२३ मध्ये ११.९ टक्क्यांचा उच्चांक नोंदवला होता. नोव्हेंबरमध्ये तो २.५ टक्के, डिसेंबरमध्ये ४.२ टक्के आणि जानेवारी २०२४ मध्ये ४.१ टक्क्यांवर घसरला होता. एप्रिल २०२३ ते मार्च २०२४ या कालावधीसाठी मागील वर्षाच्या याच कालावधीच्या तुलनेत एकत्रित वाढीचा दर ५.८ टक्के होता.

मार्च २०२४ मध्ये मॅन्युफॅक्चरिंग क्षेत्राचे उत्पादन फेब्रुवारीमधील पाच टक्क्यांवरून ५.२ टक्क्यांनी वाढले. उत्पादन क्षेत्रामध्ये, मूलभूत धातूंचे उत्पादन ७.७ टक्के, औषधी व वनस्पति उत्पादन १६.७ टक्के आणि इतर वाहतूक उपकरणांचे उत्पादन २५.४ टक्के असल्याने या क्षेत्राने वाढ नोंदवली आहे, असेही सांख्यिकी विभागाने म्हटले आहे.

दरम्यान, वीजनिर्मिती वार्षिक ८.६ टक्क्यांनी वाढली असून फेब्रुवारीमध्ये ती ७.५ टक्क्यांनी वाढली होती. खाण उत्पादनात १.२ टक्क्यांनी वाढ झाली आहे. मार्चमध्ये वापर आधारित वर्गीकरणानुसार मार्च २०२३च्या तुलनेत आयआयपी वाढीचा दर प्राथमिक वस्तूंमध्ये २.५ टक्के, भांडवली वस्तूंमध्ये ६.१ टक्के, पायाभूत सुविधा, बांधकाम वस्तूंमध्ये ६.९ टक्के, अधिकृत आकडेवारीनुसार ग्राहकोपयोगी वस्तूंमध्ये ९.५ टक्के आहेत, असेही या अहवालात म्हटले आहे.