Mukesh Ambani: उद्योगपती आणि रिलायन्स इंडस्ट्रीजचे चेअरमन मुकेश अंबानी यांना पुन्हा एकदा धमकीचा ईमेल आला आहे. ही धमकी त्याच अज्ञात व्यक्तीने दिली आहे ज्याने 27 ऑक्टोबर रोजी दोन ईमेल पाठवून 200 कोटी रुपयांची मागणी केली होती.

तिसर्‍या ईमेलमध्ये, त्या व्यक्तीने खंडणीची रक्कम वाढवून 400 कोटी रुपये केली आहे कारण अंबानींनी त्यांच्या मागील दोन ईमेलला उत्तर दिले नव्हते.

या धमकीचे गांभीर्य लक्षात घेऊन मुंबई पोलिसांनी सोमवारी अंबानी यांच्या दक्षिण मुंबईतील निवासस्थानी (अँटिलियाची) सुरक्षा वाढवली आहे.

पहिला धमकीचा ईमेल 26 ऑक्टोबरला आला होता. यामध्ये धमकी देणाऱ्या व्यक्तीने 20 कोटी रुपयांची मागणी केली होती. नंतर त्याची किंमत 200 कोटी रुपये करण्यात आली. पैसे न दिल्यास मुकेश अंबानींना गोळ्या घालू, असेही धमकीच्या मेलमध्ये म्हणले आहे.

अंबानींच्या अधिकृत आयडीवर पाठवलेल्या तिसऱ्या ईमेलमध्ये लिहिले आहे की, ''तुमची सुरक्षा कितीही चांगली असली तरीही आम्ही तुम्हाला मारू शकतो. यावेळी किंमत 400 कोटी रुपये आहे आणि पोलीस आमचा तपास करुन अटक करू शकत नाहीत.''

गेल्या वर्षीही मिळाली होती धमकी

मुकेश अंबानींना अशी धमकी मिळण्याची ही पहिलीच वेळ नाही. यापूर्वी गेल्या वर्षी मुकेश अंबानी आणि त्यांच्या कुटुंबीयांना जीवे मारण्याच्या धमक्या आल्या होत्या. त्यानंतर मुंबई पोलिसांनी बिहारमधील दरभंगा येथून धमकीचे कॉल केल्याप्रकरणी एका व्यक्तीला अटक केली होती. आरोपींनी मुंबईतील सर एचएन रिलायन्स फाउंडेशन हॉस्पिटल बॉम्बने उडवून देण्याची धमकी दिली होती.