मुंबई : फोर्ब्स मासिकाने नुकत्याच जाहीर केलेल्या जगातील सर्वांत श्रीमंतांच्या यादीत रिलायन्स इंडस्ट्रीजचे अध्यक्ष मुकेश अंबानी पहिल्या दहा श्रीमंतांच्या यादीत सामील झाले आहेत. मुकेश अंबानी यांनी या यादीत दहावे स्थान मिळवले असून, त्यांची एकूण संपत्ती ९.४५ लाख कोटी रुपये (११४ अब्ज डॉलर) आहे. अंबानी यांनी सर्जी ब्रेनला मागे टाकून हे स्थान मिळवले आहे. जगातील श्रीमंतांच्या यादीत भारतीय अब्जाधीश गौतम अदानी १६ व्या स्थानावर आहेत.

या यादीत फ्रेंच अब्जाधीश ‘लुई व्हिटॉन’चे सीईओ बर्नार्ड अर्नाल्ट पहिल्या क्रमांकावर आहेत. त्यांची एकूण संपत्ती सध्या १८.६० लाख कोटी रुपये आहे, तर ‘टेस्ला’चे सीईओ एलॉन मस्क दुसऱ्या स्थानावर आहेत. त्यांची संपत्ती १६.७४ लाख कोटी रुपये आहे. त्यानंतर या यादीत अनुक्रमे जेफ बेझोस, मार्क झुकेरबर्ग, लॅरी एलिसन, वॉरेन बफेट, बिल गेट्स, स्टीव्ह बाल्मर, लॅरी पेज यांचा क्रमांक लागतो.