Relience Industries News : तुम्ही दैनंदिन वस्तू खरेदी करण्यासाठी दुकानात जाता तेव्हा, दुकानदाराजवळ तुम्ही पेटीएम किंवा फोनपेचे लहान आकाराचे स्पीकर अनेकदा पाहिले असेल. हा एक छोटासा साउंडबॉक्स आहे जो दुकानदाराला पेमेंट केल्यावर पैसे मिळाल्याची माहिती देतो.

हिंदुस्थान टाइम्सच्या वृत्तानुसार रिलायन्स पेटीएम आणि फोन पेच्या या छोट्या साऊंडबॉक्सला आव्हान देण्याची तयारी करत आहे. अलीकडील अहवालात असे समोर आले आहे की रिलायन्स सध्या त्यांच्या काही स्टोअरमध्ये साउंड बॉक्सची चाचणी करत आहे.

रिलायन्स कोणतीही नवीन गोष्ट सार्वजनिकरित्या लॉन्च करण्यापूर्वी स्टाफला डिव्हाइस देऊन अंतर्गत चाचणी करते. रिलायन्सचे हे नवीन डिव्हाइस किधी लॉन्च करेल याबद्दल कोणतीही अधिकृत माहिती समोर आलेली नाही.

जोपर्यंत अंतर्गत चाचणीचे निकाल आणि फीडबॅक समोर येत नाही, तोपर्यंत कंपनी हे उपकरण बाजारात आणण्यासाठी कोणतीही मोठी घोषणा करणार नाही.

साउंडबॉक्स म्हणजे काय?

या छोट्या साउंड बॉक्समध्ये एक स्पीकर (4 W) देण्यात आला आहे आणि हे उपकरण ब्लूटूथ कनेक्टिव्हिटीसह येते. कोणताही ग्राहक कोणत्याही व्यापाऱ्याला पेमेंट करताच, हा बॉक्स प्राप्त झालेल्या पेमेंटची माहिती देण्याचे काम करतो, ज्यामुळे फोन पुन्हा पुन्हा तपासण्याची गरज नाही.

पेटीएम साउंडबॉक्सची वैशिष्ट्ये

पेटीएम हे साउंड बॉक्स उपकरण बाजारात आणणारे पहिले प्लॅटफॉर्म होते. पेटीएमचा साउंड बॉक्सला 7 दिवसांची बॅटरी लाइफ आहे आणि 11 प्रादेशिक भाषांना तो सपोर्ट करतो.

आता रिलायन्स साउंड बॉक्समध्ये कोणते फिचर्स दिले आहेत आणि या उपकरणाची किंमत किती असेल? हे पाहणे महत्त्वाचे आहे.