ZEE-Sony Merger: सोनी ग्रुपने अधिकृतपणे झी एंटरटेनमेंट एंटरप्रायझेस लिमिटेडला सांगितले आहे की ते त्यांचे भारतीय युनिट विलीन करण्याची योजना रद्द करण्याचा विचार करत आहेत. ब्लूमबर्गने सोमवारी 22 जानेवारी रोजी प्रसिद्ध केलेल्या अहवालात ही माहिती दिली.

त्यामुळे गेल्या दोन वर्षांपासून दोन्ही कंपन्यांमध्ये विलीनीकरणासाठी सुरू असलेले सर्व प्रयत्न संपुष्टात आले आहेत. अहवालानुसार, जपानची आघाडीची मनोरंजन कंपनी सोनीने सोमवारीच ZEE ला एक टर्मिनेशन लेटर पाठवले आहे.

ब्लूमबर्गच्या अहवालानुसार, सोनीने विलीनीकरण कराराच्या अटींची पूर्तता केली नाही. सध्याचे झीचे सीईओ पुनित गोएंका यांच्या भूमिकेबाबत दोन्ही कंपन्यांमध्ये मतभेद होते.

विलीनीकरणानंतर स्थापन होणार्‍या नवीन संस्थेचे नेतृत्व पुनित गोयंका यांच्याकडे असेल यावर आधी दोन्ही कंपन्यांमध्ये सहमती झाली होती. मात्र, आता पुनित गोयंका यांची सेबीच्या चौकशीच्या पार्श्वभूमीवर सोनी यासाठी तयार नाही. दोन कंपन्यांमधील विलीनीकरणाचा करार तुटण्यामागे हे प्रमुख कारण असल्याचे मानले जात आहे.

जर हे विलीनीकरण झाले असते, तर Zee आणि Sony ने सुमारे 10 अब्ज डॉलर मुल्यांकन असलेली एक मोठी मीडिया कंपनी तयार झाली असती.

विलीनीकरणाचा करार 21 डिसेंबरपर्यंत पूर्ण होणार होता

हा विलीनीकरणाचा करार 21 डिसेंबर 2023 पर्यंत पूर्ण होणार होता. करारानुसार तीन वेळा मुदतवाढ घेण्यात आली. झीने डिसेंबरमध्ये मुदतवाढ मागितली होती. यानंतर सोनीने विलीनीकरणाची तारीख वाढवण्याची तयारी दर्शवली होती.

नवीन कंपनीचे नेतृत्व कोण करणार हा मुद्दा होता. प्लॅननुसार, पुनित गोयंका हे नवीन संस्थेचे व्यवस्थापकीय संचालक बनणार होते. परंतु जून 2023 मध्ये सेबीने पुनित गोएंका आणि सुभाष चंद्रा यांना कोणत्याही कंपनीचे बोर्ड मेंबर बनण्यास बंदी घातली होती.