Adani Group: अदानी समूहाच्या अडचणी कमी होण्याची चिन्हे दिसत नाहीत. कारण हिंडेनबर्गच्या अहवालानंतर आता नव्या अहवालाने अदानी समूहावर प्रश्न उपस्थित केले आहेत. वर्षाच्या सुरुवातीला हिंडेनबर्गने अदानी समूहावर प्रश्न उपस्थित केले होते, त्यानंतर कंपनीचे मोठे नुकसान झाले होते.

आता ऑर्गनाइज्ड क्राइम अँड करप्शन रिपोर्टिंग प्रोजेक्ट म्हणजेच जगातील आघाडीचे गुंतवणूकदार जॉर्ज सोरोस यांच्या OCCRP ने अदानी समूहाच्या गुंतवणुकीवर गंभीर आरोप केले आहेत. फर्मचा दावा आहे की अदानी कुटुंबाच्या भागीदारांनी शेअर्समध्ये गुंतवणूक करण्यासाठी 'ऑफ शोअर' म्हणजेच अपारदर्शक निधीचा वापर केला आहे.

 2013 ते 2018 या कालावधीत समूह कंपन्यांनी त्यांचे शेअर्स गुपचूप खरेदी केले. नॉन-प्रॉफिट मीडिया ऑर्गनायझेशन OCCRP ने मॉरिशस आणि अदानी ग्रुपच्या अंतर्गत ईमेलद्वारे हे व्यवहार झाले असल्याचा दावा केला आहे.

3 तासात 35,000 कोटींचे नुकसान

ऑर्गनाइज्ड क्राइम अँड करप्शन रिपोर्टिंग प्रोजेक्ट म्हणजेच OCCRP ने केलेल्या आरोपांनंतर अदानी ग्रुपच्या शेअर्समध्ये मोठी घसरण झाली आहे. अदानी समूहाने आरोपांचे खंडन करूनही शेअर्सची विक्री होताना दिसत आहे.

दहापैकी दहा शेअर्स घसरणीसह व्यवहार करत आहेत. अदानी पॉवरचे शेअर्स 3 टक्क्यांहून अधिक घसरले, तर अदानी ट्रान्समिशनचे शेअर्स 3.3 टक्क्यांनी घसरले. अदानी एंटरप्रायझेसचे शेअर्स 2.50 टक्‍क्‍यांनी घसरले, तर अदानी ग्रीन एनर्जी आणि अदानी टोटल गॅस 2.25 टक्‍क्‍यांनी घसरले.

अदानी समूहाच्या सर्व 10 सूचिबद्ध कंपन्यांमधील घसरणीमुळे समूहाच्या एकूण मार्केट कॅपमध्ये 35,624 कोटी रुपयांचे नुकसान झाले. बुधवारी व्यवहार संपेपर्यंत समूहाचे मार्केट कॅप 10,84,668.73 कोटी रुपये होते, जे आता 10,49,044.72 कोटी रुपयांवर आले आहे.