- ऋत्विक जाधव

मयूर युनिकोटर्सचे उद्योग वर्गीकरण ग्राहक टिकाऊ वस्तूंच्या क्षेत्रांतर्गत लेदर आणि लेदर उत्पादने अंतर्गत येते. या कंपनीचे बाजारमूल्य २४६५०८.१६ लाख रुपये आहे. ही कंपनी प्रामुख्याने कोटेड टेक्सटाईल फॅब्रिक्स, कृत्रिम लेदर आणि पीव्हीसी विनाइलच्या निर्मितीच्या व्यवसायात आहे.

तिची उत्पादने फूटवेअर, फर्निशिंग्ज, वाहन उत्पादन कंपन्यांमध्ये मोठ्या प्रमाणावर वापरली जातात. मयूर युनिकोटर्सचे विविध उद्योगांमध्ये वैविध्यपूर्ण ग्राहक आहेत. मारुती सुझुकी, टाटा मोटर्स, महिंद्रा अँड महिंद्रा, एमजी मोटर्स, होंडा मोटरसायकल, बाटा, रिलॅक्सो, व्हीकेसी, पॅरागॉन, बॅग-इट आदी नामांकित कंपन्यांच्या सिंथेटिक लेदरच्या गरजा ही कंपनी पूर्ण करते.

उत्पादन क्षमता

कंपनीकडे सध्या ४८.६ दशलक्ष लीनियर मीटर पीव्हीसी कोटेड फॅब्रिक आणि पाच दशलक्ष लीनियर मीटर पीयू कोटेड फॅब्रिकच्या वार्षिक उत्पादनाची क्षमता आहे. देशांतर्गत संघटित विभागात सिंथेटिक लेदर उत्पादनाची ही सर्वांत मोठी क्षमता आहे. कंपनी उत्पादन क्षमता वाढवण्याच्या प्रक्रियेत आहे.

तांत्रिक विश्लेषण

कंपनी नियमितपणे आपला शेअर बाय-बॅक करते. या शेअरचा चार्ट पॅटर्न इतरांच्या तुलनेत सर्वांत मजबूत आहे. गेल्या काही दिवसांपासून मजबूत होण्याची चिन्हे दाखवत जोरदार ब्रेकआउट दिला आहे.

जानेवारी २०२२ पासून त्यात ‘ट्रँगल पॅटर्न’ची निर्मिती झाली आहे. याचा अर्थ या शेअरमध्ये वाढीची क्षमता आहे. डेरिव्हेटिव्ह डेटादेखील तेजीच्या बाजूने आहे. भविष्यातील ‘ओआय’मध्ये लाँग बिल्ड-अप दिसून येते, जे अल्पावधीतही ताकद दर्शवते.

हा शेअर ५५३.६५ रुपयांच्या आसपास व्यवहार करत असताना, आपण ५४० - ५६० च्या टप्प्यात तो खरेदी करणे सुरू केले पाहिजे आणि साप्ताहिक बंद आधारावर ५१० रुपयांचा स्टॉपलॉस ठेवायला हवा.

येत्या काही दिवसांत या शेअरमध्ये मोठी तेजी पाहायला मिळण्याची शक्यता आहे. अल्प मुदतीसाठी ८०० रुपये, तर मध्यम मुदतीसाठी १,००० रुपयांचे उद्दिष्ट आहे. अल्पावधीसाठी ‘रिस्क टू रिवॉर्ड’ गुणोत्तर १:४ आहे. अल्प जोखीम घेऊन मोठ्या उद्दिष्टाची अपेक्षा ठेवली आहे. यामध्ये ४४ टक्क्यांच्या आसपास नफ्याच्या अपेक्षेने गुंतवणूक करण्यास हरकत नाही.

शेअरचे नाव : मयूर युनिकोटर्स लि.

शिफारस : खरेदी

सध्याचा भाव : ५५३.६५ रुपये

स्टॉपलॉस : ५१० रुपये

उद्दिष्ट : ८०० रुपये

कालावधी : तीन ते सहा महिने

डिस्क्लेमर आणि डिस्क्लोजर : वरील शिफारस पूर्णपणे तांत्रिक विश्लेषणावर आधारित आहे, जी भविष्यातील किमतीच्या हालचालीचा अंदाज लावण्याचा एक प्रकारचा वैज्ञानिक मार्ग आहे. सर्व गुंतवणूकदारांनी इक्विटी गुंतवणुकीतील जोखमींबद्दल योग्य माहिती घ्यावी. ऋत्विक जाधव यांचे या शेअरमध्ये वा कंपनीमध्ये कोणतेही वैयक्तिक हितसंबंध अथवा गुंतवणूक नाही. तथापि, आमच्या काही क्लायंट्सची यात गुंतवणूक असू शकते.)