मुंबई - अमेरिकी सरकारच्या कर्ज मर्यादेवर तोडगा निघून तेथील दिवाळखोरीची भीती संपुष्टात आल्यामुळे आज उत्साही गुंतवणूकदारांनी जोरदार खरेदी केली व तिसऱ्या दिवशीही भारतीय शेअर बाजार निर्देशांक वाढले. आज सेन्सेक्स ३४४.६९ तर निफ्टी ९९.३० अंश असे प्रत्येकी अर्धा टक्का वाढले.

दिवसअखेर सेन्सेक्स ६२,८४६.३८ अंशावर तर निफ्टी १८,५९८.६५ अंशावर स्थिरावला. आज धातूनिर्मिती कंपन्या, बांधकाम व्यवसाय आणि वित्तसंस्थांच्या शेअर मध्ये खरेदी झाली. तर आयटी आणि ऑइल अँड गॅस यांच्या शेअरमध्ये विक्री झाली. निफ्टी मध्ये टायटन, अल्ट्राटेक, कोल इंडिया, टाटा स्टील, महिंद्र आणि महिंद्र या शेअरचे भाव वाढले. तर ओएनजीसी, एचसीएल टेक, डिव्हिज लॅब, मारुती, पॉवर ग्रीड या शेअर चे भाव कमी झाले.

बँका आणि अन्य बड्या शेअर च्या खरेदीमुळे आज भारतीय शेअर बाजार तेजीत होते. मोठ्या कंपन्यांनी दिलेले चांगले निकाल, परदेशी वित्तसंस्थांची खरेदी आणि जागतिक सकारात्मक वातावरण यामुळे आता भारतीय शेअर बाजार नव्या सर्वकालिक उच्चांकावर जाण्याची शक्यता आहे.

- सिद्धार्थ खेमका, मोतीलाल ओसवाल फायनान्शिअल सर्विसेस.

रुपया चार पैसे घसरला

अमेरिकी डॉलरच्या तुलनेत आज रुपया चार पैसे घसरून ८२.६४ वर स्थिरावला. आज जगातील अन्य चलनांच्या तुलनेत डॉलर मजबूत होता. मात्र वाढलेला भारतीय शेअर बाजार, भारतात परदेशी निधीची आवक आणि कच्च्या तेलाचे कमी झालेले भाव यामुळे रुपया फार पडला नाही. अमेरिकेत कर्जमर्यादा वाढून दिवाळखोरीची भीती गेल्यामुळे गुंतवणूकदार आनंदीत होते त्यामुळे डॉलर मजबूत झाला. आज रुपयाचे व्यवहार ८२.५७ वर सुरू झाल्यावर त्याने आज ८२.५१ चा उच्चांक तर ८२.६७ चा नीचांक दाखवला. शुक्रवारी रुपया ८२.६० वर बंद झाला होता.