Guru Nanak Jayanti: गुरु नानक जयंतीनिमित्त आज सोमवारी शेअर बाजार बंद राहणार आहेत. अहमदाबाद, बेंगळुरू, चेन्नई, गंगटोक, गुवाहाटी, हैदराबाद, इंफाळ, कोची, पणजी, पाटणा, त्रिवेंद्रम आणि शिलाँग वगळता देशभरात बँका बंद राहतील. यामुळे मंगळवारपासून शेअर बाजारातील व्यवहाराचे सत्र सुरू होणार आहे, शाळा, महाविद्यालये आणि सरकारी कार्यालयांनाही आज सुट्टी असणार आहे.

इक्विटी सेगमेंट, इक्विटी डेरिव्हेटिव्ह सेगमेंट आणि SLB सेगमेंटमध्ये आज कोणतेही ट्रेडिंग होणार नाही. याशिवाय चलन डेरिव्हेटिव्ह बाजारातील व्यापारही बंद राहील. नॅशनल स्टॉक एक्स्चेंज आणि बॉम्बे स्टॉक एक्स्चेंज या दोन्ही एक्सचेंज हाऊसमध्ये मंगळवारी, 28 नोव्हेंबरपासून व्यवहार पुन्हा सुरू होतील.

आठवडा चार दिवसांचा असेल

बीएसई आणि एनएसईच्या सूचनेनुसार, गुरु नानक जयंतीनिमित्त सोमवारी (27नोव्हेंबर) देशांतर्गत शेअर बाजार बंद राहील. या निमित्ताने दोन्ही प्रमुख शेअर बाजारात कोणतेही व्यवहार होणार नाहीत. या वेळी मंगळवारपासून बाजार सुरू होणार आहे. अशा प्रकारे बाजारासाठी हा आठवडा पाच दिवसांऐवजी चार दिवसांचा असेल.

महिन्यातील दुसरी सुट्टी

नोव्हेंबर महिन्याच्या सुरुवातीला बाजारात एक दिवस सुट्टी होती. यापूर्वी 14 नोव्हेंबर रोजी दिवाळी बलिप्रतिपदेनिमित्त देशांतर्गत शेअर बाजार बंद होता. याचा अर्थ नोव्हेंबर महिन्यात बाजाराला दोन सुट्या आल्या आहेत.

नोंद - क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.