Share Market Opening Latest Update 9 October 2024: बुधवारी आरबीआयच्या पतधोरण बैठकीपूर्वी शेअर बाजारात तेजी दिसून येत आहे. बुधवारी (9 ऑक्टोबर) देशांतर्गत शेअर बाजार चांगल्या वाढीसह उघडले. सुमारे 200 अंकांच्या वाढीसह सेन्सेक्स 81,800 च्या वर जात होता. निफ्टीही 50 अंकांच्या वाढीसह 25,000 च्या वर होता. निफ्टी बँक देखील 100 हून अधिक अंकांनी वाढून 51,000 च्या वर व्यवहार करत होता.

मात्र, बाजार वरच्या स्तरावरून किंचित खाली आल्याचे दिसून आले. कच्च्या तेलाच्या घसरणीमुळे एचपीसीएल, बीपीसीएल, एशियन पेंट्स या शेअर्समध्ये वाढ झाली. तर, ओएनजीसी, नेस्ले, जेएसडब्ल्यू स्टील, ब्रिटानिया या शेअर्समध्ये घसरण झाली.

काल अमेरिकन बाजारात चांगली तेजी होती, तर कच्च्या तेलातही मोठी घसरण झाली. ब्रेंट क्रूड 4.5% घसरून 77 डॉलरवर आले. किंबहुना, मध्यपूर्वेतील तणावामुळे तेलपुरवठ्यावर परिणाम होत असल्याची चिंता कमी झाली आहे. हिजबुल्लाह आणि इस्रायलमध्ये युद्धविराम होण्याची आशा आहे, त्यामुळे बाजारात तेजी आहे.

BSE सेन्सेक्सच्या 30 शेअर्सपैकी 19 शेअर्समध्ये वाढ होत असून 11 शेअर्स घसरणीसह व्यवहार करत आहेत. टेक महिंद्रा, टाटा मोटर्स, एसबीआय, एशियन पेंट्स, बजाज फायनान्स, मारुती, भारती एअरटेल आणि एचसीएल टेक हे शेअर्स वधारत आहेत. एचडीएफसी बँक, आयटीसी, नेस्ले, जेएसडब्ल्यू स्टीलचे शेअर्स घसरत आहेत.

NSE निफ्टीच्या शेअर्समध्ये श्रीराम फायनान्स, टाटा मोटर्स, ट्रेंट, बजाज फायनान्स, टेक महिंद्रा यांचे शेअर्स सर्वाधिक वाढले आहेत. याशिवाय ओएनजीसी, आयटीसी, ब्रिटानिया, नेस्ले आणि एचडीएफसी बँकेच्या शेअर्समध्येही घसरण दिसून येत आहे.

आज देशांतर्गत शेअर बाजारासाठी जागतिक संकेत संमिश्र दिसत आहेत. आजच्या व्यवहारात प्रमुख आशियाई बाजारांमध्ये संमिश्र कल दिसून येत आहे. याआधी मंगळवारी अमेरिकन बाजार वाढीसह बंद झाले होते. मंगळवारी डाऊ जोन्स इंडस्ट्रियल 126 अंकांनी वधारला आणि 42080.37 च्या पातळीवर बंद झाला.

NASDAQ Composite 259 अंकांनी वाढून 18,182.92 च्या पातळीवर बंद झाला. तर S&P 500 निर्देशांक सुमारे 55 अंकांनी वाढून 5751.13 च्या पातळीवर बंद झाला.