Ram Lalla Pran Pratishtha: सोमवार दि. 22 जानेवारी 2024 रोजी अयोध्येत राम मंदिराचं उद्घाटन आणि रामलल्लाच्या मूर्तीची प्राणप्रतिष्ठा होणार आहे. या दिवशी शेअर बाजारात कोणताही व्यवहार होणार नाही. शेअर बाजारातही सुट्टी जाहीर करण्यात आली आहे. सेबी, बीएसई आणि नॅशनल स्टॉक एक्सचेंजने चर्चा करून हा निर्णय घेतला आहे.

उद्या म्हणजेच शनिवारी 20 जानेवारी रोजी शेअर बाजार उघडण्याचे आदेश जारी करण्यात आले आहेत. आत्तापर्यंत शनिवार 20 जानेवारीला फक्त दोन तास बाजार उघडण्याचा निर्णय घेण्यात आला होता. मात्र, नव्या परिपत्रकानुसार शनिवारी दिवसभर बाजारात सकाळी नऊ ते दुपारी साडेतीन वाजेपर्यंत व्यवहार होणार आहेत.

महाराष्ट्र सरकारनेदेखील सोमवारी सुट्टी जाहीर केली आहे. शुक्रवार, दि. 19 जानेवारी रोजी सामान्य प्रशासन विभागाने एक पत्रक काढून सार्वजनिक सुट्टी जाहीर केली आहे.

आरबीआयने सांगितले की, महाराष्ट्र सरकारने निगोशिएबल इन्स्ट्रुमेंट्स अॅक्ट, 1881 च्या कलम 25 अंतर्गत 22 जानेवारी रोजी सार्वजनिक सुट्टी घोषित केली आहे, त्यामुळे या दिवशी सरकारी रोखे, परकीय चलन, मनी मार्केटमध्ये कोणतेही व्यवहार आणि सेटलमेंट होणार नाही.

परिपत्रकात म्हटले आहे की सर्व थकबाकीदार व्यवहारांची पुर्तता पुढील कामकाजाच्या दिवसापर्यंत म्हणजे 23 जानेवारीपर्यंत पुढे ढकलण्यात येईल.

देशातील अनेक राज्य सरकारांनी 22 जानेवारी 2024 रोजी त्यांच्या कर्मचार्‍यांना अयोध्या राम मंदिराच्या उद्घाटन सोहळ्याला उपस्थित राहण्यासाठी सुट्टी जाहीर केली आहे.

याशिवाय केंद्र सरकारने सर्व केंद्र सरकारी कार्यालये आणि केंद्रीय संस्थांसाठी अर्धा दिवस सुट्टी जाहीर केली आहे. याचा अर्थ सरकारी बँका अर्धा दिवस बंद राहतील. काही राज्यांमध्ये सर्व बँका दिवसभर बंद राहतील.

या सोबतच 22 जानेवारीला RBI च्या 19 क्षेत्रीय कार्यालयांमध्ये 2000 रुपयांच्या नोटा बदलण्याची प्रक्रिया बंद असणार आहे. ही प्रक्रिया 23 जानेवारीपासून पुन्हा सुरू होईल. RBI ने 19 मे 2023 रोजी चलनातून 2000 रुपयांच्या नोटा काढल्या होत्या, तरीही त्या कायदेशीर निविदा आहेत.

मध्यवर्ती बँकेने लोकांना त्यांच्या जवळच्या बँकांमध्ये 2000 रुपयांच्या नोटा बदलून घेण्यासाठी 7 ऑक्टोबर 2023 पर्यंत वेळ दिला होता. आता या नोटा पोस्टाने किंवा फक्त आरबीआय कार्यालयात बदलल्या जाऊ शकतात.