पुणे : केंद्रीय लोकसेवा आयोगाच्या (यूपीएससी) वतीने घेण्यात येणारी राष्ट्रीय संरक्षण प्रबोधिनी (एनडीए) आणि नेव्हल ॲकॅडमीची लेखी परीक्षा १४ नोव्हेंबरला होणार आहे. या परिक्षेचे प्रवेशपत्र नुकतेच यूपीएससी मार्फत ऑनलाइन उपलब्ध केले आहे. ही परीक्षा ५ सप्टेंबरला होणार होती. मात्र, सर्वोच्च न्यायालयाच्या आदेशानुसार आता महिला उमेदवारांना देखील ही परीक्षा देता येणार आहे. त्यामुळे ती नोव्हेंबरमध्ये घेण्यात येत आहे.

देशातील सुमारे ७० केंद्रांवर ही लेखी परीक्षा होणार आहे. ही परीक्षा ऑफलाइन पद्धतीने होल. परिक्षेचे प्रवेशपत्र उमेदवारांसाठी ऑनलाइन उपलब्ध आहे. दरम्यान, परीक्षेच्या एक आठवड्यापूर्वी पर्यंत उमेदवारास प्रवेशपत्र न मिळाल्यास त्याने त्वरित आयोगाशी संपर्क साधावा, असे आवाहन यूपीएससीमार्फत करण्यात आले आहे.

प्रवेशपत्राशिवाय कोणत्याही उमेदवाराला परीक्षा केंद्रात प्रवेश दिला जाणार नसल्याचे ही यूपीएससीने नमूद केले आहे. तर उमेदवारांना अधिक माहिती तसेच, प्रवेशपत्र डाऊनलोड करण्यासाठी यूपीएससीच्या upsc.gov.in या अधिकृत संकेतस्थळाचा वापर करता येईल.