रागा : (फोनमध्ये खेळीमेळीने) हलोऽऽऽ...हाय दीदी! सबकुछ ठीकठाक?
दीदी : (आणखीनच खेळीमेळीने) कूल! कुठे आहेस?
रागा : तेलंगणा!
दीदी : वॉव! मला आवडलं असतं यायला! पण आमच्या नशिबात फक्‍त यूपीच दिसतेय!
रागा : तू यायला पाहिजेस इथं! इथं मस्त आहे!
दीदी : (कुरकुरत) मला यूपीत पाठवून स्वत: मात्र देशभर फिरतो आहेस! धिस इज नॉट डन!!
रागा : (दुर्लक्ष करत) दीदी, लेट मी टेल यू, इथले लोक खरंच मजेदार आहेत! मला भरपूर मतं देणार आहेत, ह्यात काही शंका नाही!
दीदी : (शंकेखोरपणाने) कशावरून?
रागा : (सहजपणे) कशावरून म्हंजे? मी लोकांना हात केला की ते उलटा हात करतात!
दीदी : (गोंधळून) म्हंजे?
रागा : (समजावून सांगत) म्हणजे मी स्टेजवरून गाडीच्या काचा बाहेरून पुसल्यासारखा हात करतो ना! तसं केलं की समोरचं पब्लिक आतून काचा पुसतं! हाहा!!
दीदी : (टोमणा मारत)...ते ठीक आहे, पण कधीतरी अमेठीतसुद्धा येत जा!! शेवटी तुझा मतदारसंघ आहे!!
रागा : (मायेनं) तू आहेस ना? मग मला कसली चिंता? उलट माझी मतं वाढतील!!
दीदी : (बहिणीचा उपदेश...) आपला मतदारसंघ आहे तर आपण येत-जात राहावं! मग लोक नावं ठेवत नाहीत!!
रागा : (बेफिकिरीने) अमेठीतून निवडून यायला तिथं जायला कशाला हवं? कुणालाही पाठवलं तरी तिथले मतदार आपल्यालाच मतं देणार! तशी त्यांना हॅबिटच आहे!!
दीदी : (सावधगिरीची सूचना करत) डोण्ट टेक एनिथिंग फॉर ग्रॅंटेड हं!! माणसानं नेहमी सावध असावं!!
रागा : (किंचित वैतागून) कमॉन दीदीऽऽ...मम्मा पण सारखं हेच सांगत असते! आता तूसुद्धा तेच सांग!
दीदी : (समजूत घालत) ‘काळजी घे’, असं आपल्या भावाला बहिणीनंच सांगायचं असतं ना?
रागा : (निवळत) काळजी घेतोय मी! म्हणूनच दुसरीकडेही उमेदवारी अर्ज भरला आहे! एक से भले दो!!
दीदी : (विचार करत) केरळातल्या वायनाडमधून ना? पण तिथं डावे लोक तुला कसं जिंकू देतील?
रागा : (उत्साहात) आरामात निवडून येईन मी दोन्ही ठिकाणी! बघशीलच तू!!
दीदी : (समाधानाने) तसं झालं तर चांगलंच आहे! पण मला वाटतं, तुला आणखी थोडी काळजी घ्यायला हवी!! मम्माचंही असंच म्हणणं आहे!!
रागा : (कपाळाला आठी घालत) आणखी किती काळजी घेणार?
दीदी : दोन्हीकडे जिंकलास तर ठीकच आहे! पण दोन्हीकडे काही विपरीत घडलं तर? मला तर वाटतं की तू आणखी एका ठिकाणी उभं राहायला हवंस!
रागा : (उडवून लावत) हा नकारात्मक विचार आहे! असं होऊच शकत नाही!! आता जागाही वाटून झाल्या! सगळे मतदारसंघ बुक झालेत! तो विषय बंद!!
दीदी : (हट्‌टाने) बंद कसा? आणखी एक भरवश्‍याचा मतदारसंघ उरला आहे की!! खास तुझ्यासाठी रिकामा ठेवला आहे! तिथून अर्ज भरलास की झालं!!
रागा : (कुतूहलानं) कुठला? आणि मला कसा माहीत नाही?
दीदी : (कोडं घालत) ओळख पाहू? एनी गेसेस?
रागा : (ओठ काढत) नाही लक्षात येत!
दीदी : चहात, आमटीत आणि लक्षात आलं हे पाहिजेच!!
रागा : (तोंड वाकडं करत) वाईट जोक!
दीदी : (जबर्दस्त सूचना करत) तू पुण्यातून का नाही उभा राहात? नाही तरी आपल्याला तिथं उमेदवार कुठे मिळतोय?