Nagpur Accident News : संपूर्ण घर सांभाळून ती नोकरी करायची. कुटुंबाचे अर्थचक्रच तिच्यावर होते. शुक्रवारी दुपारी जेव्हा पुण्याला इव्हेंटच्या कामासाठी ती घरातून जायला निघाली, तेव्हा निघताना तिने आई हुस्‍नारा बेगम हिला ‘अम्मी जा रही हू’ असे म्हटले.

मात्र, नियतीने घात केला. मध्यरात्री दीड वाजता झालेल्या अपघातात जोया उर्फ गुडीया जमालुद्दीन शेख (वय २७) हिचा मृत्यू झाला. जाताना तिने म्हटलेले शब्द अखेरचे ठरले.

ताजबाग येथील निराला सोसायटीजवळ असलेल्या प्यारेखान यांच्या घरी भाड्याने हुस्‍नारा बेगम आपल्या तीन मुलांसह राहतात. त्यात मोठा मुलगा अजहरुद्दीन शेख (वय ३१), जोया उर्फ गुडीया आणि जाकीरुद्दीन (वय २४) या भावाबहिणीचा समावेश आहे. वडिलांचा आठ वर्षांपूर्वी मृत्यू झाला.

वडिलांचे छत्र हरपल्याने तिन्ही मुलांचे शिक्षण सुटले. त्यातल्या त्यात जोया ही बारावीपर्यंत शिकली. त्याचा फायदा घेत, तिने इव्हेंट कंपनीत नोकरी सुरू केली. मोठा भाऊ हा डिश-टीव्हीचे काम करीत असून लहान भाऊ टाईल्सच्या ठेकेदारासोबत मजुराचे काम करतो.

त्यामुळे घरच्या किराण्यापासून तर आई आणि भावांच्या कपड्यापर्यंतची जबाबदारी तिचीच होती. प्रत्येकवेळी इव्हेंटसाठी ती वेगवेगळ्या ठिकाणी फिरायची. दहा दिवसांपूर्वी ती उत्तरप्रदेशातून इव्हेंटचे काम करून घरी परतली होती. त्यानंतर काल तिला पुण्यात इव्हेंटच्या कामासाठी जायचे होते.

त्यासाठी तिने आदल्या दिवशी तयारी केली. शुक्रवारी (ता.३०) नमाज अदा केल्यानंतर, ‘अम्मी जा रही हू’ असे म्हणत, तिने दुपारी तीन वाजता दोन्ही भावासह बैद्यनाथ चौक गाठले. तिथे विदर्भ ट्रॅव्हल्सच्या गाडीचे तिकीट घेत पुण्याचा प्रवास सुरू केला.

शनिवारी सकाळी मोठ्या भावाच्या मुलगा सुलतान याने तिच्याबद्दल माहिती देताच, कुटुंबातील सदस्यांना जबर धक्का बसला.

अख्ख्या परिवारावर शोककळा पसरली. तिच्या मृत्यूच्या धक्क्याने लहान भावाचा आधार तर मोठ्या भावाची ‘गुडीया’ या जगात नव्हती. दुसरीकडे अझरुद्दीनही बुलढाण्याच्या दिशेने निघाला होता.

ईदी न देताच गेली दिदी

ईद मोठा सण असल्याने या सणाच्या निमित्ताने घरातील छोट्यांना ‘ईदी’ देत, शुभेच्छा दिल्या जातात.

जोयापेक्षा वयाने लहान असलेला जाकीरुद्दीन तिच्या आठवणी सांगताना गहिवरला होता. बहिण या जगात नाही, हे त्याला कळल्यावर `आता ईदी कोण देणार यावेळी ईदी न देताच, जोया निघून गेली`, असे म्हणत तो हुंदके देत होता`. विशेष म्हणजे, आर्थिक परिस्थिती जेमतेम असल्याने शेख कुटुंब हलाखीचे जीवन जगत होते.

दहा दिवसांपूर्वी जोया इव्हेंटवरुन घरी आली. मात्र, तिलाही पैसे मिळाले नसल्याने घरात २९ तारखेला ईद हा सण साजरा करता आला नाही.

पोलिसांचीही दमछाक

जोया हिच्या आधार कार्डवर पांढराबोडी येथील पत्ता असल्याने अंबाझरी पोलिस शोध घेत, तिच्या घरी पोहचले. मात्र, जोया आणि त्यांचे कुटुंब दहा वर्षांपूर्वीच, ताजबाग परिसरातील निराला सोसायटीतील पेट्रोलपंपाजवळ भाड्याने राहण्यास गेल्याचे कळले. यातून सक्करदरा पोलिसांनी माहिती दिल्यावर त्यांनी घराचा शोध घेत, कुटुंबियांना माहिती दिली.