सेलिब्रिटी टॉक - अंकिता लोखंडे, अभिनेत्री
अभिनय क्षेत्राच्या सुरवातीच्या काळात मी कोणताही डाएट प्लॅन फॉलो करत नव्हते; तसेच वर्कआउटही करत नव्हते. परंतु, काही काळानंतर मला वर्कआउट आणि डाएट प्लॅनचे महत्त्व समजत गेले आणि मग मी त्याला सुरवात केली. याबाबतीत मी फार नशीबवान आहे की, मला खूप चांगले शरीर लाभले आहे.

यामुळे कधीच माझा बॉडीशेप बिघडलेला नाही, तरीही मी सध्या वर्कआउट व डाएटला महत्त्व देत आहे. 

आपल्याला चांगला बॉडीशेप लाभला असेल आणि आपण जीम केल्यास बॉडी टोन करण्यास मदत मिळते. मी जीमसाठी एक ट्रेनर घेतला आहे, जो माझे विविध प्रकारचे व्यायाम करवून घेत असतो. व्यायाम केला नाही, तर तुमचे शरीर ओबडधोबड वाढू लागते; तसेच नृत्य हेदेखील शरीर तंदुरुस्त ठेवण्यास मदत करते. मी अधूनमधून नृत्याचादेखील सराव करत असते.  

यासोबतच तुमच्याकडे एक चांगला डाएट प्लॅन असणेही गरजेचे असते. माझ्या ट्रेनरने मला आहारावरही नियंत्रण ठेवायला सांगितले, पण हे माझ्यासाठी खूपच कठीण होते. मी फक्त सूप आणि सलाड खाऊन दिवस काढू शकत नाही.

नशिबाने मला गोड, तेलकट आवडत नाही; तसेच मी मद्यपान, धूम्रपानही करत नाही. त्यामुळे या सगळ्या गोष्टी माझ्या जमेच्या बाजू ठरल्या. कुणालाच खरे वाटणार नाही; पण मला भात आणि आइस्क्रीमही आवडत नाही. माझ्या खाण्याच्या सवयींमुळे चपाती व भाजी हा भारतीय आहारच मला घ्यावा लागतो. त्याचबरोबर मी सीझनल फळे खाते. घरी बनवलेलेच जेवण खाल्ल्याने माझी त्वचादेखील चांगली राहते.