सातारा : वाई तालुक्‍यातील शिक्षकांना तालुका मॅप्रो कोविड हॉस्पिटलमधील (Mapro Covid Hospital) रुग्णांवरील उपचारासाठी अर्थसाहाय्य करण्याचे आवाहन आमदार मकरंद पाटील (MLA Makarand Patil) यांनी केले होते. त्यानुसार सभापती संगीता चव्हाण, उपसभापती विक्रांत डोंगरे, तहसीलदार रणजित भोसले, गट विकास अधिकारी उदयकुमार कुसुरकर, गटशिक्षणाधिकारी सुधीर महामुनी यांनी शिक्षक संघटना प्रतिनिधींची बैठक घेऊन मदतीचे आवाहन केले. त्यानंतर तालुक्‍यातील प्राथमिक, माध्यमिक शिक्षकांनी (Teachers) स्वयंस्फूर्तीने जमा केलेला 10 लाख रुपये कोविड मदत निधी आमदार मकरंद पाटील यांच्याकडे सुपूर्त करण्यात आला. (10 Lakh Assistance From Teachers In Wai For Mapro Covid Hospital Satara Positive News)

या वेळी आमदार पाटील म्हणाले, ""कोविड आजाराची साथ हे मानवतेवर ओढावलेले अस्मानी संकट आहे. या काळात वैद्यकीय कर्मचाऱ्यांचे श्रम, प्रशासनाचा वेळ आणि सर्वांकडूनच अर्थसाहाय्याची गरज आहे. यापूर्वी शिक्षकांनी स्वच्छेने कॉन्सन्ट्रेटर मशिन उपलब्ध करून आपली जबाबदारी पार पाडली आहे. आपण जमा केलेल्या रकमेतून तालुका कोविड हॉस्पिटलमधील रुग्णांना औषधे, वैद्यकीय सामग्री व नियुक्त कर्मचाऱ्यांचे वेतन यांसाठी खर्च होणार आहे. या खर्चाचा भार लाखो रुपये आहे. अनेक सेवाभावी संस्था, उद्योग यांची आम्ही मदत घेत आहोत. शिक्षकांनी कर्तव्य भावनेतून केलेल्या मदतीमुळे हॉस्पिटलमधील रुग्णांना अधिक चांगले औषधोपचार व दिलासा मिळणार आहे.''

या वेळी उपसभापती विक्रांत डोंगरे, गटशिक्षणाधिकारी सुधीर महामुनी, विष्णू मेमाणे, साईनाथ वाळेकर, तालुका शिक्षक समितीचे अनिल पिसाळ, महादेव क्षीरसागर, संघाचे सहदेव फणसे, दीपक वाघमारे, राजेंद्र दगडे, महेंद्र जगताप व शिक्षक प्रतिनिधी उपस्थित होते. जमा रक्कम तालुका कोविड हॉस्पिटलचे डॉ. मयूर बिरारे यांच्याकडे सभापती चव्हाण, उपसभापती डोंगरे, तहसीलदार भोसले, गटविकास अधिकारी कुसुरकर, गटशिक्षणाधिकारी सुधीर महामुनी, मोहन चव्हाण यांच्या उपस्थितीत सुपूर्त करण्यात आली.

10 Lakh Assistance From Teachers In Wai For Mapro Covid Hospital Satara Positive News