सातारा : मागील वर्षी सरासरीपेक्षा कमी पाऊस झाल्याने तीव्र दुष्काळसदृश परिस्थिती निर्माण झाली. भूजल पातळी दिवसेंदिवस घटत गेली असून, पावसानेही दडी मारली आहे. मे महिना ते जून महिन्याच्या दहा तारखेपर्यंत वळवाच्या पावसाने जोरदार हजेरी लावल्याने शेतीच्या पाण्याचा प्रश्‍न काही प्रमाणात सुटला आहे. मात्र, अद्यापही पिण्याच्या पाण्याचा प्रश्‍न भेडसावत आहे. आता जून महिना संपत आला तरी जिल्ह्यात अद्यापही शंभर टँकरने पाणीपुरवठा सुरू आहे.

सद्य:स्थितीत जनतेची तहान भागविण्यासाठी ९६ गावे, ३४० वाड्या-वस्त्यांना १०० टँकरद्वारे पाणीपुरवठा सुरू असून, पाण्याचा प्रश्‍न मिटण्यासाठी मॉन्सूनची प्रतीक्षा आहे. मागील मोसमात पावसाने दडी मारल्याने धरणांनी तळ गाठला आहे. जिल्ह्यात अनेक ठिकाणी जून महिना संपत येऊनही पाण्याची टंचाई सुरू आहे.

मे महिन्यातील मध्यान्हानंतर पावसाने काही विहिरी, बोअरवेलला पाणी आले आहे. मात्र, पिण्याच्या पाण्याचा प्रश्‍न अद्यापही भेडसावत आहे. मे महिन्यापर्यंत कडक उन्हाळा जाणवत होता.

मात्र, १५ मेनंतर जिल्ह्यातील अनेक भागांत वळवाच्या पावसाने हजेरी लावली. कोरड्या पडलेल्या अनेक विहिरी, नाले वाहू लागले. दुष्काळातील काही नद्या दुथडी भरून वाहिल्या. त्यामुळे शेतीच्या पाण्याच्या प्रश्‍न सुटला तरी पिण्याच्या प्रश्‍न समोर उभा ठाकला आहे. त्यामुळे येत्या काही दिवसांत प्रत्येकजण पावसाच्या प्रतीक्षेत आहे.

एक लाख १२ हजार पशुधनाची तहान टॅंकरवर

जिल्ह्यात १०० टँकरद्वारे पाणीपुरवठा सुरू आहे. त्यामध्ये एक लाख ६० हजार नागरिकांना टॅंकरने पाणी सुरू असून, एक लाख १२ हजार पशुधनाची तहान टॅंकरच्या पाण्यावर भागत आहे. त्यामुळे या दुष्काळाचा फटका पशुधनांनाही बसला आहे.

• ९६ गावे, ३४० वाड्या-वस्त्यांना १०० टँकरद्वारे पाणीपुरवठा

• पावसाने अनेक ठिकाणी पाझर तलाव व बोअरवेलला पाणी

• जुलै महिन्यात पाऊस न पडल्यास पिण्याचा प्रश्‍न होणार गंभीर

• माण तालुक्यात सर्वाधिक ४२ टँकर