वाई : पसरणी घाटात (Pasarni Ghat) पर्यटकांना (Tourists) घेऊन जाणारी गाडी रस्त्यावरील मध विक्रेत्यांना धडक देऊन खोल दरीत कोसळली. सुदैवाने ही गाडी झाडाला अडकल्याने मोठी दुर्घटना टळली. काल सकाळी वाई-पाचगणी रस्त्यावर दत्त मंदिराजवळ हा अपघात (Road Accident) झाला.

यामध्ये एक मुलगा व दोन महिलांसह पाच जण जखमी झाले. घटनास्थळी मिळालेली माहिती अशी, वाईहून पाचगणीच्या दिशेने ओडिशा (Odisha) येथील एका पर्यटकाला घेऊन जाणारी गाडी (एमएच ०१ सीपी ८५९९) चालकाचा ताबा सुटल्याने रस्त्याकडेला मध विक्री करणाऱ्या दोघांना धडक देऊन दरीत घुसली आणि एका झाडाला धडकली.

त्यामुळे जीवितहानी झाली नाही. गाडीचे मोठे नुकसान झाले. या वेळी रवी रमेश काळे (वय ३६), रूपा रमेश काळे (वय २३) हे मध विक्रेते दांपत्य व त्यांचा मुलगा विक्रम (वय ५, सर्व रा. लाखनगर, वाई), तसेच अंशुमन अखिल पाणीग्रही (वय १४) व ममता साबत (वय ४४, रा. ओडिशा) हे जखमी झाले.

त्यांना तातडीने वाई येथील बेल एअर रुग्णालयात दाखल करण्यात आले. अपघाताची माहिती मिळताच वाई पोलिसांनी घटनास्थळी भेट देऊन पुढील कार्यवाही केली.