उंब्रज (जि. सातारा) : जनसामान्यांचा विकास हा महाविकास आघाडीचा विचार आहे. पवार साहेबांच्या विचारानेच महाविकास आघाडीचे शासन स्थापन झाले. मात्र, कोरोना काळात फक्त राजकारणासाठी विरोधी भूमिका घेण्याचे काम विरोधकांनी केले असल्याचे मत सहकार व पणन मंत्री बाळासाहेब पाटील यांनी व्यक्त केले.

पाल येथील विविध विकासकामांच्या उद्घाटनप्रसंगी व कोव्हिड योद्ध्यांच्या सत्कार प्रसंगी ते बोलत होते. यावेळी खासदार श्रीनिवास पाटील, कोल्हापूर दक्षिण मतदारसंघाचे आमदार ऋतुराज पाटील, कऱ्हाड उत्तर राष्ट्रवादी काँग्रेसचे अध्यक्ष देवराज पाटील, शिक्षण व अर्थ सभापती मानसिंगराव जगदाळे, पंचायत समिती सभापती प्रणव ताटे, मा. जिल्हा परिषद उपाध्यक्ष चंद्रकांत जाधव यासह अन्य मान्यवर उपस्थित होते. मंत्री पाटील म्हणाले, कोरोना काळात व्यवसाय ठप्प झाल्याने राज्याचा महसूल कमी झाला. त्याचा परिणाम विकास कामांवर झाला. महाविकास आघाडीने महात्मा फुले कर्ज माफी योजना त्वरीत लागू केल्याने शेतकरी कर्ज मुक्त झाला. सहकार मंत्री झाल्यानंतर पहिल्या सेवा सोसायटी इमारतीचे उद्घाटन केले आहे. 

प्रतिकारशक्‍ती वाढवून कोरोनावर मात करणे हाच पर्याय : उदयनराजे

ऋतुराज पाटील म्हणाले, कमी वयात आमदार होता आले. समाजकारण, राजकारण करण्याची संधी लाभली असून महाविकास आघाडी शासनाच्या माध्यमातून तळागाळापर्यंत जाऊन काम करण्याची संधी मिळाली आहे. राज्याचे भविष्य घडविण्याची ताकद महाविकास आघाडीत असून विरोधक आमच्या पट्यात आला की कार्यक्रम होणार, असा टोला त्यांनी लगावला. श्रीनिवास पाटील म्हणाले, कुठलेही काम करताना चातुर्याने करायची कला पाहिजे. जात, पात, लिंग भेद न ठेवता एकत्र राहिले तर नक्कीच प्रगती होते. यावेळी मानसिंगराव जगदाळे, चंद्रकांत जाधव, उद्धवराव फाळके यांनी मनोगत व्यक्त केले. देवराज पाटील यांनी प्रास्ताविक केले. सर्जेराव खंडाईत यांनी आभार मानले. कार्यक्रमास सरपंच, उपसरपंच, विविध संस्थांचे पदाधिकारी, ग्रामस्थ उपस्थित होते.

संपादन : बाळकृष्ण मधाळे