सातारा : शहरातील भटक्‍या कुत्र्यांचा बंदोबस्त करण्याची मागणी नुकतीच भाजपच्या नगरसेविका आशा पंडित यांनी निवेदनाव्दारे नगराध्यक्षा माधवी कदम यांच्याकडे केली. निवेदनानुसार कार्यवाही न झाल्यास कुत्री नगरपालिकेत आणून सोडण्याचा इशाराही निवेदनात देण्यात आला आहे. 

पंडित यांच्या वतीने माधवी कदम यांनी निवेदन स्वीकारले. या वेळी उपनगराध्यक्ष किशोर शिंदे, माजी नगरसेवक किशोर पंडित व नागरिक उपस्थित होते. पंडित यांनी निवेदनात म्हटले आहे, की शहराच्या विविध भागात भटक्‍या कुत्र्यांची संख्या वाढली आहे. ही भटकी कुत्री नागरिकांवर हल्ला चढवत आहेत. यामुळे नागरिकांमध्ये घबराट पसरली आहे. या भटक्‍या कुत्र्यांचा बंदोबस्त करण्यासाठी डॉग व्हॅन भाडेतत्त्वावर घेण्याची मागणीही पंडित यांनी निवेदनात केली आहे. डॉग व्हॅनच्या मदतीने पकडलेली भटकी कुत्री नंतर कोयना किंवा चांदोली अभयारण्यात सोडण्याची मागणी त्यांनी केली आहे.

मराठा समाजाची परीक्षा पाहू नका; उदयनराजेंचा इशारा 

पालिकेच्या वतीने भटक्‍या कुत्र्यांच्या निर्बिजीकरणाची मोहीम राबविण्यात येत होती. यासाठी दरवर्षी लाखो रुपये खर्च होतात. मात्र, तरीही साताऱ्यात भटक्‍या कुत्र्यांची संख्या वाढत आहे. एकंदरच ही मोहीम संशयास्पद असून, नागरिकांच्या पैशाचा अपव्यय थांबविण्याची विनंतीही पंडित यांनी निवेदनात केली आहे. निवेदनानुसार कार्यवाही न झाल्यास नगरपालिकेच्या आरोग्य विभागात कुत्री सोडण्याचा इशाराही त्यांनी निवेदनात दिला. 

संपादन : बाळकृष्ण मधाळे