कोरेगाव (जि. सातारा) : कोरोनाबाधितांच्या वाढत्या संख्येच्या पार्श्वभूमीवर शहरात अत्यावश्‍यक सेवा वगळून सुरू झालेल्या सात दिवसांच्या स्वयंस्फूर्त बंदला पहिल्या दिवशी उत्स्फूर्त प्रतिसाद मिळाल्याने संपूर्ण शहरभर शुकशुकाट निर्माण झाला होता. दरम्यान, बुधवारी नव्याने आणखी सात बाधित आढळून आल्याने शहरातील बाधितांचा आकडा वाढताना दिसत आहे. बाधितांच्या वाढत्या संख्येमुळे शहरामध्ये चिंताजनक परिस्थिती निर्माण झाली आहे. 

या पार्श्वभूमीवर शहरातील व्यापारी संघटनेच्या वतीने शहरात काही दिवसांसाठी लॉकडाउन सुरू करण्याची मागणी करण्यात आली होती. तसे निवेदन मुख्याधिकाऱ्यांना दिले होते. यासंदर्भात जिल्हाधिकाऱ्यांचे मार्गदर्शन मागवावे लागेल, असे मुख्याधिकाऱ्यांनी व्यापारी संघटनेच्या शिष्टमंडळास सांगितले होते. त्यामुळे प्रशासकीय पातळीवर यासंदर्भातील निर्णय प्रलंबित राहिला. दरम्यान, व्यापारी संघटनेची मागणी व जनरेट्यामुळे दोन दिवसांपूर्वी नगराध्यक्षा, उपाध्यक्षांसह सर्व नगरसेवकांची तातडीची बैठक झाली. या बैठकीत शहरामध्ये अत्यावश्‍यक सेवा वगळून सात दिवसांच्या स्वयंस्फूर्त बंदचा निर्णय झाला. त्यानुसार, बुधवारी पहिल्या दिवशी बंदला उत्स्फूर्त प्रतिसाद मिळाला. 

प्रतापगडाच्या तटबंदीसाठी सह्याद्री धावला!

दरम्यान, मंगळवारी (ता. आठ) रात्री प्रशासनाने जाहीर केलेल्या अहवालानुसार तालुक्‍यातील 31 जण बाधित आढळून आले आहेत. त्यात कोरेगाव व रहिमतपूर प्रत्येकी सात, कुमठे व तारगाव प्रत्येकी तीन, बोरगाव येथील दोन आणि तडवळे, जळगाव, आसरे, पिंपोडे बुद्रुक, सुर्ली, वाठार किरोली, भोसे, जांब, आर्वी येथील प्रत्येकी एकाचा समावेश आहे. दरम्यान, खासगी रुग्णालयामध्ये सातारारोड येथील 72 वर्षे वयाच्या एका पुरुषाचा मृत्यू झाला आहे. आता तालुक्‍यातील आजअखेरपर्यंतच्या एकूण बाधितांची संख्या एक हजार 250 झाली असून, 27 जणांचा मृत्यू झाला आहे. कालपर्यंत उपचारानंतर 841 जण बरे झाले असून, 103 जणांवर उपचार सुरू असल्याचे आणि 275 जण गृहविलगीकरणामध्ये असल्याचे प्रशासनाकडून सांगण्यात आले. 
 
संपादन : बाळकृष्ण मधाळे