लोणंद : पाडेगाव (ता. खंडाळा) येथील समता कनिष्ठ महाविद्यालयातील (Samata Junior College) इयत्ता ११ वीतील विद्यार्थ्यांने वसतिगृहातील खिडकीला गळफास घेऊन आत्महत्या केली. देवराज प्रशांत धोतरे (वय १६, रा. अकलूज, ता. माळशिरस, जि. सोलापूर) असे त्याचे नाव आहे. मध्यरात्री सव्वादोनच्या सुमारास ही घटना घडली.

दरम्यान, त्याच्या आत्महत्येचे कारण समजू शकले नाही. याबाबत लोणंद पोलिसांकडून मिळालेली माहिती अशी, पाडेगाव (ता. खंडाळा) येथील समता कनिष्ठ महाविद्यालयाच्या बाजूलाच मुलांचे वसतिगृह आहे. या वसतिगृहात रूम नंबर एकमध्ये देवराज धोतरे राहात होता. खोलीतच खिडकीच्या लोखंडी गजाला दोरउडीच्या मदतीने गळफास घेऊन आत्महत्या केली.

याबाबत विशाल विजय जाधव (रा. शास्त्री चौक लोणंद, ता. खंडाळा) यांनी लोणंद पोलिस ठाण्यात फिर्याद दिली आहे. लोणंद पोलिस ठाण्यात अकस्मात मृत्यूची नोंद करण्यात आली आहे. गुरुवारी लोणंद प्राथमिक आरोग्य केंद्रात मृतदेहाचे शवविच्छेदन करून मृतदेह नातेवाइकांच्या ताब्यात देण्यात आला. लोणंद पोलिस ठाण्याचे (Lonand Police Station) पोलिस हवालदार श्री. भिसे हे अधिक तपास करत आहेत.