कऱ्हाड : सातारा लोकसभेसाठी (Satara Loksabha) मी इच्छुक असून दोनवेळा ताकदीने निवडणूक लढलो आहे. सातारची जागा ही शिवसेनेचीच (Shiv Sena) आहे. महायुतीच्या माध्यमातून सातारा जिल्ह्यात शिवसेनेचा भगवा फडकेल, असा मला आत्मविश्वास आहे, असे मत मुख्यमंत्री एकनाथ शिंदे गटाचे पुरुषोत्तम जाधव यांनी व्यक्त करुन लोकसभेसाठी इच्छुक असणाऱ्यांचे टेन्शन वाढवलेय.

मुख्यमंत्री शिंदे यांचे समर्थक पुरुषोत्तम जाधव (Purushottam Jadhav) हे कऱ्हाड (जि. सातारा) येथे ज्येष्ठ नेते यशवंतराव चव्हाण यांच्या समाधीस्थळी दर्शनासाठी आले होते. त्यादरम्यान त्यांनी माध्यमांशी संवाद साधला. सातारा लोकसभा मतदार संघ शिवसेनेचाच असल्याने लोकसभेला कोणत्याही परिस्थितीत निवडणूक लढणार असल्याचे सांगून जाधव म्हणाले, लोकसभेसाठी मी यापूर्वी दोनवेळा निवडणुका ताकदीने लढलो आहे. महायुतीच्या माध्यमातून सातारा जिल्ह्यात शिवसेनेचा भगवा फडकेल असा मला आत्मविश्वास आहे.

उदयनराजे माझे मित्र आहेत. लोकशाहीत संख्येला महत्व असून छत्रपती उदयनराजे हे राज्यसभेचे सदस्य आहेत. त्यामुळे देशाचे पंतप्रधान नरेंद्र मोदी (Narendra Modi) आणि महायुतीतील सर्वजण त्याचा विचार करतील. सर्वसामान्य कुटुंबातील एखाद्याला उमेदवारी मिळाली तर काय हरकत आहे. सर्वसामान्यांचे प्रश्न सोडवण्यासाठी माझ्यासारखा खासदार झाला तर लोकांचे प्रश्न सुटतील. त्यामुळे मला खात्री आहे की महायुतीच्या माध्यमातून मला संधी दिली जाईल, असेही त्यांनी यावेळी स्पष्ट केले.