वाई (जि. सातारा) : केंद्र सरकारने आणलेले कृषी विधेयक देशातील शेतकऱ्यांसाठी अतिशय घातक असून या विधेयकाने सर्व शेतकरी संपणार आहेत. कृषी उत्पन्न बाजार समित्या बंद करून लाखो नोकरदार बेरोजगार होणार आहेत. त्यामुळे कॉंग्रेस शेतकऱ्यांना संपू देणार नाही, असा इशारा जिल्हा कॉंग्रेसचे अध्यक्ष डॉ. सुरेशराव जाधव यांनी केला. 

वाई येथील कृषी उत्पन्न बाजार समितीच्या आवारात जिल्हा कॉंग्रेसने केंद्र सरकारच्या कृषी विधेयकाच्या विरोधात केलेल्या आंदोलनप्रसंगी डॉ. जाधव बोलत होते. या प्रसंगी जिल्हा कॉंग्रेस प्रभारी संजय बालगुडे, युवक कॉंग्रेसचे जिल्हाध्यक्ष विराज शिंदे, कॉंग्रेस सेवादलाचे जिल्हा अध्यक्ष प्रतापसिंह देशमुख, महिला कॉंग्रेसच्या जिल्हा सरचिटणीस मंजिरी पानसे, तालुका युवक कॉंग्रेसचे अध्यक्ष प्रमोद अनपट, प्रदीप जायगुडे, तालुका महिला कॉंग्रेसच्या अध्यक्षा अल्पना यादव, विलास पिसाळ उपस्थित होते. 

पृथ्वीराज चव्हाणांचे मोदी सरकारला खुले आव्हान!

बाजार समितीच्या आवारात जिल्हा कॉंग्रेसच्या वतीने केंद्र सरकारच्या शेती विधेयकाविरोधात मोर्चा काढण्यात आला होता. त्यामध्ये शेतकरी बैलगाडीतून सहभागी झाले होते. यावेळी डॉ. जाधव यांनी केंद्र सरकारवर हल्लाबोल केला. विराज शिंदे म्हणाले, "लॉकडाउनमुळे युवकांना बेरोजगार करणारे भाजपचे सरकार आता शेतकऱ्यांना उपाशी मारणार आहे. कृषी विधेयक आणून त्यांच्या तोंडचा घास पळवण्याचे काम करीत आहे. श्री. बालगुडे यांचेही भाषण झाले. 

संपादन : बाळकृष्ण मधाळे