सातारा : जिल्हा मध्यवर्ती सहकारी बॅंकेच्या निवडणुकीसाठी अंतिम मतदार यादी आज प्रसिद्ध होणार होती. मात्र, खासदार रणजितसिंह निंबाळकर व आमदार जयकुमार गोरे यांच्या पाणीपुरवठ्यातील ठराव पात्र केल्याबद्दल उच्च न्यायालयात माण तालुक्यातून याचिका दाखल झाल्याने न्यायालयाने सुनावणी होऊन निर्णय होईपर्यंत अंतिम यादी प्रसिद्ध करू नये, असे आदेश न्यायालयाने दिले. त्यामुळे आज बॅंकेची अंतिम मतदार यादी प्रसिद्ध होऊ शकली नाही.

जिल्हा बॅंकेच्या निवडणुकीसाठी कच्चा मतदार यादीवर सुनावणी होऊन आमदार जयकुमार गोरे आणि खासदार रणजितसिंह निंबाळकर यांचे पाणीपुरवठ्यातील ठराव जिल्हा बॅंकेने अपात्र यादीत टाकले होते. त्यावर या दोघांनी विभागीय सहनिबंधकांकडे हरकत घेतली होती. त्यावर सुनावणी होऊन सहनिबंधकांनी दोघांचेही हे ठराव पात्र ठरविले होते. त्यामुळे अंतिम मतदार यादी २७ तारखेला प्रसिद्ध होणार याकडे सर्वांचे लक्ष लागले होते. मात्र, या दोन्ही पात्र ठरावांविरोधात उच्च न्यायालयात याचिका दाखल झाल्याने न्यायालयाने अंतिम मतदार यादी निकाल झाल्याशिवाय प्रसिद्ध करू नये, अशी सूचना केली. त्यामुळे जिल्हा बॅंकेची अंतिम मतदार यादी आता निर्णयानंतरच प्रसिद्ध होणार आहे.