सातारा : कोरोना बाधितांची वाढती संख्येचा विचार लक्षात घेऊन सातारा शहरातील मेडिकल दुकानांव्यतरिक्त अन्य अत्यावश्यक सेवांवर बंधने येण्याची शक्यता वर्तवली जात आहे. सातारा आणि शाहूपूरी ठाण्याच्या पाेलिस कर्मचा-यांनी शहरातील काही भागांमधील मुख्यतः चाैकांमधील दुकाने आज (शुक्रवार) बंद केली. यामध्ये माेती चाैका, शनिवार चाैक, शाहू चाैक आदी चाैकांचा समावेश आहे.

सातारा जिल्ह्यात गत 24 तासांत 1395 नागरिकांना कोरोनाची बाधा झाली आहे. याबराेबरच 15 जणांचा मृत्यू झाला आहे. कोरोनाचा संसर्ग वाढू नये यासाठी शासनाबराेबरच जिल्हा प्रशासन आणि पाेलिस दल यांच्यावतीने विविध उपाययाेजना करण्यात येत आहेत. शासन आदेशानूसार अत्यावश्यक सेवेत येणाऱ्या किरणामाल दुकाने, मेडिकल, मिठाई, खाद्य पदार्थ, हाॅटेल आदींना नियमांच्या अधीन राहून व्यवसाय सुरु ठेवण्यास परवानगी देण्यात आली आहे.

याबराेबरच स्थानिक प्रशासनास बाजारपेठेसह अन्य वेगवेगळ्या परिसरात नागरिकांची गर्दी हाेत असेल तर तातडीने उपाययाेजना म्हणून संबंधित ठिकाणचे व्यवसाय बंद ठेवण्याचे निर्देश देण्यात आले आहेत. त्यानूसार सातारा शहरातील माेती चाैक, शनिवार चाैक, शाहू चाैक, समर्थ मंदिर चाैक, राजवाडा आदी चाैकांमधील व्यावसायिकांना त्यांची दुकाने बंद ठेवण्याचे निर्देश देण्यात आले. दरम्यान 45 वर्षांवरील व्यापाऱ्यांनी कोरोनाची लस घ्यावी, दुकानात बसणा-या कामगारांची टेस्ट करून घ्यावी. ज्या व्यापाऱ्यांकडे कोरोना टेस्ट केलेले निगेटिव्हचे प्रमाणपत्र असेल त्यांनाच दुकाने उघडण्याची परवानगी देण्यात येईल असे प्रशासनाने स्पष्ट केले आहे.

काळजात धडकी भरवणाऱ्या वायरमनच्या अपघाताचा व्हिडीओ व्हायरल

शहरातील भाजीपाला, फळविक्रेते, दूध विक्रेते, चिकन- मटण, किराणा दुकानदारांनी लवकरात लवकर प्रमाणपत्र काढावे असेही सूचित करण्यात आले. ज्या व्यापाऱ्याकडे प्रमाणपत्र नाही त्याने दुकान उघडल्यास त्याच्यावर दंडात्मक कारवाई करून पोलिस ठाण्यात फौजदारी गुन्हा दाखल केला जाईल असा इशारा देण्यात आला आहे. सातारा जिल्ह्याचे पालकमंत्री बाळासाहेब पाटील आज (शुक्रवार) साता-यातील बाजारपेठेत फिरुन परिस्थितीचा आढावा घेणार आहेत.

सातारा शहरात कोरोना लसीकरण पालिकेच्या कस्तुरबा रुग्णालय, गाेडाेली प्राथमिक आराेग्य केंद्र तसेच जिल्हा रुग्णालयात सुरु आहे. त्या ठिकाणी लस देण्याची व्यवस्था करण्यात आल्याची माहिती आराेग्य विभागातून देण्यात आली.